Ndaw mbanj gou miz ranz ndeu heuhguh “Ranzcwz”, ranz de miz lwg- sai ndeu caeuq lwgmbwk ndeu, lwgsai laux heuhguh Daegcwz, lwgmbwk iq heuhguh Dahyah. Gou heuh daxboh Daegcwz guh Naxguenj, heuh daxmeh Daegcwz guh Naxmehcwz. Gou doeg cuhcungh seiz, Daegcwz ngamq ndaej bet gouj bi, nuengxsau de ngamq ndaej haj roek bi.

Seizhaenx, mbanjranz dou cungj youq henz dah, raemxdah hwnj sang seiz, bae gizlawz guhhong couh aeu yungh aen ruzfaex iq. Bungz daengz mwh cuengq sujgyaj, dou cungj daj hagdangz dauqma ranz. Miz ngoenz ndeu, daxboh daxmeh Daegcwz cungj bae gwnz bya guhhong, ce Daegcwz caeuq Dahyah song lwg youq ranz. Aenvih seizhaenx lij caengz an densen, ranzranz cungj mbouj miz densi yawj, lwgnyez youq ndawranz youh mbwq youh mbouj miz saeh guh, caiq gangj Daegcwz dwg lwgsai, maij buet ok ranz bae guhcaemz. Seizhah youh hwngqdigdig, bae henz dah loengh raemx ceiq miz yinxdaeuz lo, yienghneix, Daegcwz couh boux dog laeglemx buet okrog bae henz dah guhcaemz.

Caj daengz banhaemh, daxboh daxmeh Daegcwz guhhong dauqranz, cij raen Dahyah gag youq gyanghongh guhcaemz, mbouj raen gij ngaeuz Daegcwz, cam Dahyah hix mbouj rox, heuh le geij sing hix mbouj raen Daegcwz han, cam le geij ranz hix naeuz Daegcwz mbouj youq. Naxguenj caeuq Naxmehcwz couh gaenjgip byaij okbae ra, bungz bouxlawz cam, gizgiz cungj ra gvaq le hix mbouj raen Daegcwz.

Doeklaeng, caezgya youq gwnz bo guhhong hix menhmenh dauqranz, rox Daegcwz mbouj raen le, couh bang- fwngz caez ra. Hoeng, ra daengz mbwn cungj yaek laep lo, hix ra mbouj raen, caezgya geizheih dangqmaz, ndaw mbanj baenzneix iq, cij miz geij aen ranz youq, danghnaeuz Daegcwz mbouj youq ndaw mbanj, de youh rox bae gizlawz ne? Cingq youq caezgya mbouj rox baenzlawz guh seiz, miz bohlungz ndeu sawqmwh buet ma naeuz, gyangngoenz de raen Daegcwz gag youq ndaw dah vad ruzfaex iq guhcaemz, caezgya dingqnyi le gaenj- gip buet bae henz dah ra. Hoeng, vanzlij mbouj raen Daegcwz youq henz dah, cij raen aen ruzfaex iq ndeu deng cug youq henz ndoi. Bouxlawz cungj liuh mbouj daengz Daegcwz doek dah bae, nyinhnaeuz de bae ndaw ndoi gizlawz guhcaemz naiq le ninz ndaek lumz dauqranz ndwi.

Doeklaeng Mehgux ndaejnyi miz vunz naeuz Daegcwz gyangngoenz youq ndaw dah vad aen ruzfaex iq gvaq, couh naeuz de dauqranz seiz, raen aen ruzfaex iq lae youq gyang dah, de couh rag aen ruzfaex iq bae henz dah cug. Yienghneix naemj, caezgya couh ngeizvaeg Daegcwz aiq youq henz dah loengh ruzfaex iq, mbouj louzsim doek haeuj ndaw dah bae, caiq gangj de mbouj rox dajcaemx, aiq deng dairaemx lo.

Ngeix daengz gijneix, Naxguenj couh gaenjgip duet buhvaq, saet haeuj ndaw dah, aen’gyaeuj ndaem haeuj ndaw raemx bae, gvaq ndaej mbouj geij nanz, de couh con aen gyaeuj hwnjdaeuj, diemheiq geij mbat youh ndaem haeuj ndaw raemx bae, yiengh- neix ndaem raemx、con gyaeuj diemheiq lai baez, aiq gvaq le buenq aen cungdaeuz, hix ra mbouj raen Daegcwz. Naxmehcwz baez ngeix daengz Daegcwz aiq dairaemx, couh unqgyad boemz youq henz dah, doq swenjdaej doq hemq:“Daegcwz a! Lwg gou a!” Aenvih seizhah doekfwn lai, raemxdah dumh hwnj lai, seiz- haenx mbwn youh laepcaem, ndaem bae daejdah hix yawj mbouj raen maz.

Cingq youq caezgya mbouj miz banhfap seiz, miz vunzmbanj ndeu naeuz bae henz ranz raemj gooen daeuj lauz, danghnaeuz Daegcwz caen dairaemx, aiq gooen ndaej ngaeu daengz buhvaq de, couh ndaej hawj ndang de riengz gooen hwnjdaeuj lo. Bouxsai couh bae raemj gooen, mehmbwk couh youq henz ndang Naxmehcwz nai de. Gooen raemj daeuj le, mbangj boux ndwn youq henz dah rongh dendungz, mbangj boux fwngz gaem gooen ndwn youq gwnz ruzhung lauz bae lauz dauq. Seizhaenx, cij raen ronghndwen lumj bingzseiz nei venj youq gyaeuj bo, ronghlwenq de ciuq youq gwnz dah lwenqliklik, daengx diuz dah cij dingqnyi gij sing duzbid ciuz buenx gij sing vunz daej, engq hawj vunz dungxliengz. Aenvih vunzmbanj cungj daeuj bangfwngz, sei Daegcwz dauqdaej ndaej lauz hwnjdaeuj lo. Naxmehcwz baez raen, gvih youq henz, daej ndaej yaek dai yaek lix, itcig hemqyaya yaek riengz Daegcwz caemh bae. Miz geij mehyah baenzlawz rex de cungj rex mbouj ndaej hwnj. Naxmehcwz cij rox daej, geij ngoenz mbouj gwn mbouj ndoet, doeklaeng gyo- ndaej miz caezgya bangfwngz guh gij saehlaeng Daegcwz.

Miz coenz vahsug ndeu naeuz “fuk mbouj miz sueng, hux mbouj yiengh dog”. Daegcwz dai bae ndaej mboengq ndeu le, Naxmehcwz haemhhaemh cungj bae henz dah daej ra daeglwg, daengx mbanj cungj dingqnyi gij sing daej de, hawj vunz gyoh dangqmaz. Youh gvaq ndaej caenh ndeu, gou dingq daxmeh naeuz Naxmehcwz aenvih nyaenx mbouj ndaej daeglwg dai bae, youq ndawranz venj hoz lo, vut Naxguenj caeuq Dahyah song bohlwg gag youq aen biengz neix. Aen ranz 4 boux vunz youq geij ndwen seizgan laebdaeb dai bae song boux, hawj meh mbouj miz lwg, youh hawj lwg mbouj miz meh, bouxlawz caen rox gij indot gyoengqde?

Doeklaeng youh dingq ranzvunz youq gangj, baez daengz byonghhwnz, couh dingqnyi henz Ranzcwz miz gij sing mehyah daejngungu, hawj vunz dingq le ndang saenq raixcaix. Caezgya cungj nyinhnaeuz aiq dwg hoenzfangz Naxmehcwz sij mbouj ndaej Daegcwz caeuq aen ranz neix, cij nanznanz mbouj nyienh lizbae. Doeklaeng miz vunz naeuz aeu diuz cag Naxmehcwz venj hoz bae naengj, couh ndaej hawj hoenzfangz de sim’an lizbae lo. Caen dahraix bw, gvaqlaeng gyanghwnz couh mbouj ndaejnyi gij sing mehyah daej lo. Hoeng, geij ranz vunz youq henz Ranzcwz aenvih dwglau, couh buen bae gizwnq youq lo. Mbouj geij nanz, Naxguenj hix daiq Dahyah daj lajmbanj bae ndaw cin youq lo. Caiq gvaqlaeng, ndaejnyi Naxguenj aeu ndaej yah moq, Dahyah hix menhmenh majhung lo.

Cibgeij bi gvaqbae, seizneix gou raen Dahyah ciemhciemh majhung baenz boux lwgsau gyaeundei ndeu, dauqngeix daengz gij saeh ranz de, ndawsim nyaenx mbouj ndaej gag naemj: Seizgan dwg yiengh doxgai ndei ndeu, ndaej hawj vunz lumz gij indot; hoeng hix dwg yiengh doxgai rwix ndeu, ndaej hawj vunz bungz gij haemzhoj gak cungj gak yiengh. Mboujlwnh ndawbiengz bienqbaenz yienghlawz, daengngoenz lij lumj gaeuq nei bin hwnj youh doek roengz. Baez nanz, aiq caezgya couh geiq mbouj ndaej gij saeh Ranzcwz lo. Raeuz mbouj rox ngoenzcog yaek bungz maz saeh, cij miz engqgya insik ngoenzneix, gvaq ndei ngoenzneix, cij mbouj rox ienqcak.