Miz mboengq ndeu, gou daegbied gyaezmaij duzdouq iq, couh laemxsim gouz bae gouz dauq, heuh daxmeh gou cawx duz ndeu. Daxmeh euq mbouj ndaej, deng cawx duz ndeu hawj gou.

Miz ngoenz ndeu daxmeh dauqma seiz, gou youq gyae couh raen de ndaw fwngz riuj aen roengq ndeu, ndaw roengq miz duzdouq hau diuqyekyek ndeu. Gou sikhaek buet gvaqbae, gwnzgwnz lajlaj yawj bae yawj dauq: De hau lumj nae, lumjnaeuz beij nae lij hau, rwz raez- rangrang danhseih rieng dinjdetdet, langhnaeuz mwngz mbouj yawj sijsaeq ne couh yawj mbouj raen dahraix. De miz giz ceiq daegbied dwg lwgda de, lwgda de hoengzhwdhwd bae, lumj song naed majnauj hoengz luemjmabmab. Aenvih de ngamq biek cij, youh iqetet yiengh dwggyaez dangqmaz, ndigah gou heuh de guh“Lingzlungz”. Miz de le, ranz dou lai miz haujlai yinxdaeuz lo.

Langh gangj gij sibgvenq saedceij de, duzdouq neix cingq caeuq duzmou doxlumj caez, ngoenzngoenz gwn liux youh gwn dem. De gwn doenghyiengh seiz, gij yiengh de caen sawj vunz riu mbouj ndaej, daej mbouj baenz, raen miz doenghyiengh soengq daengz le couh youq ndaw roengq buet geij baez gonq, yawj le caen mbouj miz vunz couh gaemz hung gwn ndaej vannoeknoek bae. Langhnaeuz mwngz nyauz de, de couh caengz fouq lwgda coh mwngz, hawj mwngz simvueng bae. Langhnaeuz mwngz hawj gijgwn hawj de noix, de couh youq ndaw roengq buet bae buet dauq mbouj dingz mbouj duenh, hawj mwngz sim mbouj ndaej caem. Baez youq seiz neix gou couh ndaw sim gag nauhbodbod: Lingzlungz ha Lingzlungz, ndaek cojcoeng iq gou, gou ngoenzngoenz hawj mwngz gwn ndei youq ndei, mwngz lij youq giz haenx nyauz bae nyauz dauq, mwngz yaek guh maz ne?

Couh aenvih de maij gwn gyaez ning, lij miz gienh saeh ndeiriu ndeu: Ngoenz haenx, gou dawz gijgwn banhaemh duh Lingzlungz coq haeuj ndaw roengq le, couh bae ninz lo. Byonghhwnz ndiu le couh dingqnyi gwnz yangzdaiz miz ningdoengh, couh guhmuengz ngauz ndiu daxmeh caeuq daxboh, gyoengqde hix dingqnyi gwnz yangzdaiz miz ningdoengh lo, lau miz bouxcaeg, couh guhmuengz buet daengz yangzdaiz, hai daeng, hat sing hung ndeu：“Lwgcaeg mwngz, buet haeuj lawz bae?”Danhseih baez yawj, mbouj miz maz bouxcaeg, cij dwg Lingz- lungz youq ndaw roengq buetbuet diuq- diuq. Yienghneix Lingzlungz deng doek- saet lo, lwgda dinghdingh cim baenaj youq. Dou daengx ranz vunz cungj riu hwnjdaeuj lo.

Mwngz yawj neix couhdwg duzdouq iq Lingzlungz, yienznaeuz de ak gwn, hoeng dou daengx ranz vunz cungj gyaezmaij de.

（Luz Swhcinz）