Ngoenzneix cuengqhag ma ranz, dax- boh lwnh gou, de youq ndaw gunghyenz gip ndaej duz roegguq ndeu.

Daxboh vix hawj gou yawj, gou yawjraen miz duz roegguq ndeu deng lamh youq yangzdaiz. De gwnz ndang lumj daenj geu buhvaq mong ndeu, hoz lumj gyok gaiq sujbaq ndaem hau doxgek ndeu dem. De yawj daeuj lau dangqmaz, song ga saenz- gywggywg. Gou gaenjgip ndingq boi raemx ndeu hawj de gwn, hoeng de deihdeih doiqlaeng, mbouj gwn. Gou youh vanq gaem haeuxsan ndeu youq baihnaj de, de yawj cungj mbouj yawj. Doeklaeng gou youh ra daeuj bonj sawgojgaeq ndeu gangj gojgaeq hawj de nyi, de ngiengx gyaeuj yawj gou, yaep da gubgub……

Mwhneix, gou dingqnyi daxboh doiq daxmeh naeuz: “Dahlwg ndang nyieg, raeuz gaj duz roegguq neix aeuq dang hawj de boujbouj ndang ba……” Dai lo! Duzroegguq miz nanh, gou vaiq siengj banhfap gouq de!

Gou caeg gej ok diuz cag lamh ga roegguq haenx, umj de ma daengz bak cueng, youq ndaw sim doiq de naeuz: “Roegguq, roegguq, mwngz vaiq mbin.” Roegguq ndwn youq gwnz cueng nyeux yawj gou, lumj dwg doiq gou naeuz “gyo’mbaiq”. Gou yiengq de vad fwngz, de dopdop fwed, bongh mbin bae gyae lo.

Yienznaeuz gou mbouj ndaej gwn dang roegguq, hoeng raen duz roegguq ndaej swyouz, ndawsim gou angq raixcaix!

（Cangh Yinhyij raiz Ouh Caijfangh hoiz）