Seizcin daeuj, rumzraeuj ci lo, fwnz doek lo, va hai lo, doenghnaz naj mbanj nauhyied lo.

Gyangngoenz, gyoengq bouxlaux youq ndaw naz vad fagbien gyaep vaiz cae naz、rauq naz, sing vaiz momo、sing vunz hatho、sing gvej ciengqgo、sing roeg angq ciuz, gyaux baenz souj go gig ndeidingq ndeu.

Gyanghaemh, gyoengq bouxsai diemj rongh bogfeiz bae ndaw doenghnaz coeg bya, gij bogfeiz youq ndaw haemhlaep myidmyanz lumj ndaundeiq gwnzmbwn, youh lumj ronghrib, sanj youq gwnz raemx ndaw naz.

Gyanghaemh diemj feiz bae coeg bya, dwg gij saeh vunzlaux, hoeng gou gyaez caeuq daxboh caez bae, daxboh hix maij miz vunz riengz bangfwngz, baenzneix de couh hawj gou aemq aen rieng riengz laeng.

Diemj bogfeiz bae ndaw naz coeg bya dwg gienh saeh mizyinx ndeu. Daxboh fwngz ndeu gingz bogfeiz, fwngz ndeu gaemh fagca, youq ndaw naz doq byaij doq ra.

Bya dwg daj ndaw gamj goengqbya youz okdaeuj, ndij gij raemxrij lae haeuj mieng lae haeuj ndaw naz. Gij bya neix cungj dwg byahaux、bya’ndoek、byaleix, youh raez youh hung, youq ndaw raemx dep dwk namhnaz bingzbwd youzlele. Yawj cinj duzbya hung le, daxboh fagca ndeu coeg roengzbae, duzbya youq laj cukcak geij baez, couh deng daxboh gaemh hwnjdaeuj, gveng haeuj ndaw rieng gou aemq daeuj. Aenvih seiz coeg bya fwngz ndeu gingz bogfeiz, danghnaeuz aeu lingh fwngz bae gaeb bya, ndang duzbya raeuz- ratrat baenzlawz gaeb ndaej? Aeu fagca bae coeg, duzbya couh buetdeuz mbouj ndaej lo. Daxboh lwnhnaeuz, youq cietheiq laebhah gaxgonq, duzbya ngamq daj ndaw gamj ninz ndiu, fanjying nguh, vei coeg ndaej;danghnaeuz gvaq laebhah le, fwn doek byaj mig, gyoengq duzbya couh bienq ndaej gvai fouzbeij, ning di de couh rox, couh nanz coeg ndaej lo.

Naz mbanj dou cungj dwg nazboengz caeuq nazlaeg, gou gaenq youq laeng daxboh, song cik ga loemq haeuj ndaw namhboengz caez lo. Gou gannanz riengz dwk, baenz haemh seizgan, dungxvaq cungj dwg namh- boengz. Mizseiz ndaw gaiq naz ndeu miz haujlai bya, dou couh mbouj aeu byaij lai. bogfeiz hix mbouj yungh swnj, bog ndeu couh gaeuq lo. Bogfeiz aeu daeuj diemj rongh haenx, mizmbangj dwg nge faexcuk, miz- mbangj dwg faexgovaiz. Faexgovaiz miz haujlai youz, bag baenz diuz dak sauj le, cug baenz bog iq, diemj feiz le youh rongh youh dingj ndaej nanz.

Moix haemh, mboujguenj miz geij lai bya, daxboh coeg ndaej 8 duz 10 duz baenzneix couh dauqranz lo, mbouj dam lai. Daxboh naeuz, gyoengq duzbya neix, mbouj ndaej coeg caez, aeu ce gyoengqde ok gyaeq, mboujnex bilaeng couh nanz miz bya hung lo.