Gou gaemfwngz lwgnyez riengz dwk aeu aen giuz bae daeuq duzmeuz, sing unq naeuz:“Hei, gaej aeu giuz moeb de, danghnaeuz mwngz moeb de in, de couh mbouj caeuq mwngz guhcaemz lo, rox caengz?” Gou ngamq gangj sat, byawz rox de doq guh, cix mbouj lumj haxbaenh baenz yungh- rengz bae vut giuz. Baezneix duzmeuz mbouj leix de, hix mbouj buetdeuz, caih de vut giuz gvaqdaeuj. De raen duzmeuz cungj mbouj dam de, dingz fwngz mbouj vut giuz coh duzmeuz lo, ndwn gizhaenx hemq “meu” sing ndeu, duzmeuz cix gik hai lwgda yawj de, laepda ninz dauq lo. “Mwngz mbouj dingq gou gangj, baenzneix raen caengz, de mbouj nyienh caeuq mwngz caemz lo!” De mbouj guhsing, youh bae vut giuz moeb duzmeuz, gou lau doeklaeng duzmeuz deng de loengh dai bae, gou couh yo giuz hwnjdaeuj, naeuz:“Bae, raeuz bae gwn doxgaiq.”

Dou ngamq byaij ok rog ding, daxbuz de couh ma daengz. De doq hemq “buz” doq buet coh buz de, gaem gen buz de beng byaij haeuj bakcauq, gwq hemq:“Buz, buz! Duzmeuz, duzmeuz.” “O, hemq buz daeuj yawj duzmeuz ha?” Buz de riunyumj gaenlaeng de, gou hix byaij gaenlaeng. Byaij haeuj bakcauq le, yi, duzmeuz haxbaenh lij ninz gwnz cauq seizneix cix mbouj raen lo! Yawjyawj ndaw gungx hix mbouj raen, caen geizheih, bae gyawz ne, hix mbouj raen de ok rog ding ha! Gou “meu meu” hemq song sing, cij dingqnyi gij sing iqetet “meu meu” han, gou nyengrwz bae dingq, o, duzmeuz ndoj haeuj ndaw cauq bae lo. Gou youh “meu meu” geij sing, duzmeuz hix han gou, cix mbouj nyienh okdaeuj. Ha ha, aiq haxbaenh de deng lwgnyez moeb lai, seizneix ndoj hwnjdaeuj lo. Caen dwg gvai lai lo.

Duzmeuz ranz gou unqswnh dangqmaz, lwg go gou cuengqhag dauqma maij bae rop de, umj bae umj dauq, mbangjseiz lij cuengq haeuj ndaw daehgau bae, ruj bae ruj dauq guhcaemz, duzmeuz hix caih de. Gou cungj mbouj gamj aeu fwngz bae lumh, engq mbouj gamj umj de! Lwgnyez auiq daeuj ranz gou guhcaemz, baez daengz couh buet bae ndaw bakcauq ra duzmeuz gonq, ndaej raen duzmeuz couh riuhehe, lumjbaenz yawjraen daxmeh de nei baenz sim’angq.

Sam. Dauqraen Meuz Dauq

Duzmeuz ranz gou ceiq mbwq couhdwg, de cingh maij daeuj nem gou lai. Gou baenzneix lau de, de lij baenzngoenz nem youq gwnz gyaeuj- hoq gou, roxnaeuz got din gou, moix baez de baenzneix, gou couh lau ndaej yaek daej bae!

Baez daengz gwn ngaiz, daengx ranz vunz naengh youq henz daiz, de ceiq maij aeu song cik ganaj ing youq gwnz gyaeujhoq gou. Gou baez- baez cungj deng doeksaet, hoeng, saenq ganaj de de couh deng doek roengzbae, gou lau deng nyauj de raehruru sieng gou, miz di ndatheiq ndaq de:“Cingh daeuj nem gou, vaqbuh seuq gou deng mwngz gauj uq caez!” De lumjbaenz rox gou ndaq de, gag cuengq ga roengzbae. Hoeng, ngamq gvaq ndaej yaep ndeu, gou cij bauz ndaej geij gaemz haeux, de fwt youh yat gyaeujhoq gou lo. Gwn donq ngaiz ndeu, daeuj nem gou geij baez bae, geu vaq gou lij uq gvaq boux bae ndaemnaz!

Bohlungz cam:“Vihmaz de cungj mbouj daeuj nem gou? Sou cungj mbouj hawj de gwn doxgaiq, yawj de lij daeuj lwi?” De baez daeuj nem gou, gou couh nip doxgaiq hawj de gwn. Nyi bohlungz baenzneix gangj, gou cazyawj caenh ndeu. Caen dahraix bw! Duzmeuz cungj mbouj bae nem boux- wnq, aenvih gyoengqde cungj mbouj nip doxgaiq hawj de gwn. O, yenzlaiz de baenzneix gvai, vunz gwn caeuz de hix aeu gwn, byawz hawj gwn byawz mbouj hawj gwn de cungj rox caez!

Miz haemh ndeu gwn caeuz seiz, de youh daeuj nem gou, gou mbouj dam de, gag gwn faenh gou. Gaxgonq de baez nem gou, gou couh nip doxgaiq hawj de gwn. Ngoenzneix deq haujlai nanz, lij caengz ndaej gwn, de couh “meu meu” heuh gou. Gou lijdwg gag gwn, mbouj langh de. Baenzneix de simgip lo, yaek yat daengz gwnz daiz daeuj. Gou doq hat de baez he, de rox gou caen hozndat lo, riengjret buetfufu bae ndoj. Ndawsim hozhaenz hoznyap de yaek dai bae, doeklaeng mbouj ndaej laebdaeb gvenq de gwn lo.

Daj haemhhaenx hainduj, gou raen duzmeuz couh lumjbaenz raen duzma nei, gyae raen couh deuz, mbouj hawj de gyawj gou. Miz haet ndeu hwnjdaeuj, yah gou naeuz:“Duzmeuz mbouj raen lo, aiq ngoenz- lwenz gyanghaemh okbae mbouj dauqma lo.” Gou baez doeksaet, ndawsim miz di mbouj onj, lau duzmeuz caen liz ranz bae lo. Yienznaeuz gou mbouj maij de nem gou, hoeng gou hix haengj ciengx de youq ranz, de okrog aiq oksaeh.

Daengz banngaiz, daxlungz dax- baj daeuj gwn ngaiz, cam naeuz duzmeuz dauqma caengz, gou naeuz mbouj raen de ma ne. “Aiq ngoenz- lwenz gyanghaemh gaenq deng ma hung haeb dai lo. Gaxgonq dou ciengx miz duzmeuz ndeu couhdwg yiengh- neix, okbae haemh ndeu mbouj dauqma, haet daihngeih senq deng haeb dai.” Daxbaj naeuz. “Ha?” Gou caen mbouj saenq, ndawsim youh nanzgvaq youh ienqhoij, mbouj wnggai lizgyae de, baenzneix de couh mbouj rox buet ok rog bae lo, ai!

Maij youq dou gwn caeuz seiz hix aeu gwn couh gwn ba, maij nem gou couh nem ba, ciengx duz meuz neix baenzneix nanz, mbouj rox mbouj nyinh caen lumj vunzcaen nei, baez mbouj raen, ndawsim byouqnyaunyau, ndawranz hix caembyambyam.

（caengz sat）