Yahdaiq gou youq lajmbanj, baez daengz sujgyaj, daxboh daxmeh couh soengq gou daengz giz haenx youq duenh seizgan ndeu. Lajmbanj mbouj miz laeuzsang doengh damq doengh, mbouj miz ci rim roen nauhyied caeuq hoenghhwng, mbouj miz sing lahbah giceh yiengj bae yiengj dauq. Cungj miz mbwn heu、fwj hau、ndoi bya caeuq doenghnaz, cungj miz raemx lae sizsiz caeuq gyoengq nyez youq ndaw raemx doxloengh guhcaemz, cungj miz duzroeg heuh lumj ciengqgo caeuq duzbid hemq lumj lej gangj……

Baihnaj lajluengq ranz yahdaiq mbouj hung geijlai, ndaem miz godauz、 goit、 go’ndae, cungj raen miz rengzmingh hoenghhwd. Seizcin, vadauz hai doh gyaeujngeiq, duj beij duj ndei; seizhah, gwnz gyaq makit goit ngeiqit rim bae, mwnmwn hoenghhoengh; seizcou, makndae baenz ndei venj youq gwnz ngeiq, lumj baenz aen baenz aen daengloengz, vunz baez raen couh gag maez gag angq.

Baihlaeng ranz yahdaiq miz gyaek reihbyaek mbouj hung mbouj iq ndeu, cawzliux ndaem miz di byaekheu, vanzlij ndaem doenghgij gvehoengz gou ceiq gyaez gwn haenx.

Geiq ndaej ngoenz sujgyaj bi’gvaq ndeu, gou soengz youq dieg gvehoengz yawj doenghgij gvehoengz youh nduen youh hung haenx gag riu, myaiz yaek doek lo. Yahdaiq rox gou hoz ngeix gijmaz, naeuz:“Dwg mbouj dwg siengj gwn gvehoengz ha?”Gou haenqrengz ngaekngaek gyaeuj, da muengh yahdaiq han naeuz：“Wz! Wz!”Yahdaiq riu hwnjdaeuj lo, yaep fouq lwgda cim gou：“Ndaej ha! Haengjdingh hawj mwngz gwn gvehoengz, danhseih mwngz yaek coengh yahdaiq ciemz rum gonq.”Gou mbouj oksing yaep ndeu, ndaw sim miz di dajsuenq: Ciemz rum yienznaeuz miz di baeg, danhseih miz gvehoengz gwn bw! Yienghneix naemj le couh ngaekngaek gyaeuj, han naeuz：“Mbouj miz vwndiz!”Neix guh le, gou haengjdingh ndaej gwn gvehoengz lo.

Yahdaiq daiq gou daengz reihbyaek le vix go byaeklwg naeuz：“Neix dwg go byaeklwg ngamq- ngamq hwnj, mwngz ciemz gij rum bangxhenz go byaeklwg bae, yahdaiq bae aeu gvehoengz daeuj hawj mwngz.” Gou han caez bae, baenzlawz miz sim ciemz rum, hoz cungj ngeix aen gvehoengz vannoeknoek nei.

Mbouj gvaq yaep ndeu yahdaiq umj aen gvehoengz dwggyaez ndeu dauq lo, doq byaij doq cam：“Yenzyenz, ciemz ndaej geijlai rum gvaq?”“Haujlai bw!”Couh youq seizneix yahdaiq yawjraen gij doenghgo gou ciemz haenx lo, mbouj miz banhfap dwk naeuz：“Boux cojcoeng iq gou ha, mwngz ciem mbouj deng rum ha, neix dwg go byaeklwg bw.”Gou sikhaek singj gvaqdaeuj lo, cuengq roengz doenghgij byaeklwg ndaw fwngz ngamqngamq ciemz hwnj haenx, soengz hwnjdaeuj, yawjyawj yahdaiq saeknaj ndaq gou：Dai lo, mbouj ndaej gwn gvehoengz lo! Yahdaiq gyangz gaemz heiq ndeu：“Dwg mbouj dwg ngeix gwn gvehoengz ndwi? Ndaej la, ndaej la, ngoenz ndat yienghneix bae, lwgnyez hix mbouj ngaih, bae gwn gvehoengz ba.”Dingqnyi yahdaiq baenzneix gangj, gou ndaej cuengq gaemz heiq naek ndeu lo.

Caen dwg doengh gvehoengz gou ngeix bae ngeix dauq haenx, naeng mbang baihndaw hoeng, ndum le hom singj, gwn le myaiz conh gaij hawq, caen dwg gwn coq ndaw bak, van daengz ndaw sim. Doenghgij gvehoengz cauhsi ndaw hawsingz baenz- lawz beij ndaej hwnj? Gou doq gwn gvehoengz doq dauqngeix gij saeh ciemz “rum”, ndaw sim cungj miz di ienqhoij：“Yahdaiq, daxbaenh ngeix gwn gvehoengz ndwi, mbouj laemxsim dingq vah mwngz, hix mbouj sijsaeq yawj, ciemz deng go byaeklwg dwggyaez mwngz bae lo. Neix yawj daeuj, guhsaeh caen mbouj ndaej ngeix sam ngeix seiq bw, baezlaeng gou gaij bae!”Yahdaiq song fwngz gop aen naj gou, sim soeng dwk riu lo：“Wz, lan ndei, mbouj ienuengj byaeklwg deng ciemz bw!”

Mizseiz, gou couh gag siengj hwnj gij saeh youq lajmbanj, siengj daengz doengh ngoenz sim- angq hozmaez gou caeuq goengda、 yahdaiq doengzcaez gvaq haenx, ngeix daengz gou caeuq gyoengqde doengzcaez haenqrengz youq reihbyaek dwkbwnh、dwkraemx、mbaet byaek……saedceij lajmbanj miz neix miz haenx、gvaqyinx dangqmaz, neix lumjnaeuz hawj duenh saedceij lwgnyez gou biensij le bien faenzcieng ndei ndeu.