Gyanghaet singj gvaqdaeuj le, gou doq ietnonx doq raurumz, sawqmwh gou roxnyinh mizdi mbouj doiqloh——hangz heuj baihgwnz miz saenj heujnaj ndeu ning lo.

Mwh gwn caeux, saenj heujnaj haenx gingqyienz hainduj doenghyubyub lo.

Daengz seiz gwn ngaiz, saenj heuj haenx cabheiq lai lo, de mbouj dingz bibuengq baedauq, lumj diuqfoux nei. Gou cam de: “Mwngz dauqdaej roengz mbouj roengzdaeuj?” Saenj heujnaj diuqbeiz han:“Gou couh mbouj roengzdaeuj, mwngz siengj banhfap aeu gou roengzdaeuj vei!”

Gwn caeuz gvaq le, gou cingj daxgoeng daeuj bangfwngz. Goeng aeu diuz maehau iq heux baenz aen gvaengz ndeu gonq, daep hwnj saenj heuj soengdoengh bae, yienzhaeuh swnh gou mbouj louzsim, sawqmwh haenqrengz daz baez ndeu, “Aiyu, heuj gou!” Baezneix gou caen roxnyinh in lo, lij ok lwed dem. Daxgoeng youh gipmuengz bang gou aeu faiq daeuj naenx goekheuj, hawj de dingz lwed.

Doeklaeng, daxgoeng riu dwk doiq gou naeuz:“Goengheij mwngz, youh maj- hung lo.”

Yienzlaiz, neix hix dwg lwgnyez hungmaj itdingh aeu gingqgvaq haenx. Gou dawz saenj heuj loenq neix siujsim cang haeuj aen hab bae, dangbaenz geiqniemh ciengxlwenx.

（Yenz Suhyungz raiz Ouh Caij- fangh hoiz）