Ngeix daengz seiz gaxgonq,

Ra haeux donq mbouj raen,

Gungcanjdangj daeuj daengz,

Cungguek raen mbwn rongh.

Gaijfang geijcib bi,

Raeuz raen ndi (ndei) liux nauq,

Baengh dangj daeuj lingjdauj,

Gyauq guh monz youh monz.

Gungcanjdangj gangj leix,

Yienghyiengh ngeix beksingq,

Gangj diuzdiuz cungj cingq,

Raeuz ndaej ing ndaej baengh.

Gungcanjdangj lumj boh,

Vix loh hawj raeuz byaij,

Miz gyoengqde daeuj daiq,

Roen baihnaj ronghsag.

Ndaem haeux mbouj nab liengz,

Siengj daeuj daengx sim roux,

Ndaem faex miz ngaenz bouj,

Vunzmbanj bouxboux angq.

Vunzgeq 60 bi,

Ndaej dij goj lingx ngaenz,

Yienznaeuz geijcib maenz,

Gwndaenj cix mbouj you.

Boux maiq caeuq lwggyax,

Ra boux goq mbouj miz,

Gungcanjdangj caen ndi(ndei).

Gijmaz cungj soengq daeuj.

Banneix youq ndaw mbanj,

Ciengx doihduz daihbaj,

Ndaem mak rim gwnz bya,

Ra ngaenz ndaej vei lai.

Boux bae guh seng’eiq,

Bi beij bi ndaej lai,

Ngoenz sou cienz sou caiz,

Lumj log vaiz haeuj riengh.

Hawj raeuz byaij roen hung,

Gyoengqvunz bouxboux angq,

Caiq byaij hwnj siujgangh,

Raeuz angqyangz gvaq ngoenz.

Ranz rengq guh ranz laeuz,

Cwngfuj bouj hawj ngaenz,

Ranz youq guh ndaej maenh,

Rumzfwn daengz mbouj lau.

Swlaizsuij daengz ranz,

Mbanjmbanj roensuijniz,

Dienhdaeng ronghbibi,

Miz gwn youh miz daenj.

Youq gyae yawj aen mbanj,

Ndongqrangrang lumj gim,

Cungj laihnaeuz ndaw singz,

Gizgiz cingh dangqmaz.

Gyanghongh ndaem go va,

Gwnz bya ndoeng faex laep,

Raemx lae lumj doxgyaep,

Caekcaek heu lumj yawh.

Ndaw mbanj caeuq gwnz haw,

Doegsaw hix doxlumj,

Bouxhaw caeuq bouxrungh,

Cungj doengzcaez hwnjdangz.

Daiq raeuz byaij siujgangh,

Raeuz doq angq doq bae,

Diuz roen neix mbouj yaez,

Yied bae yied raen rongh.

Aen dangj raeuz miz sim,

Cim bae gyae bae gyengq,

Va hai doh seiqlengq,

Guekgya engq hoenghhwd.

Raeuz aeu dingq dangj gangj,

Ganq siujgangh sevei,

Caiq gvaq sam haj bei(bi),

Caen ndei liux ndei nauq.

Gaen riengz Gungcanjdangj,

Byaij siujgangh daengz gwnz,

Mbouj faen ngoenz caeuq hwnz,

Gaen ciuh vunz raeuz guh.