It. Meuz Cing Lumj Vunz

Gou doeg cuhcungh seizhaenx, deng duzma yak ndeu haeb gvaq. Ndigah, cigdaengz seizneix gou lij lau ma yaek dai, bae ranzvunz raen naj bakdou miz ma, gou couh lau ndaej hemq hwnjdaeuj. Lienz duzmeuz gou hix lau, gwnz loh nyangz ma meuz, gou doq buetdeuz. Goj naeuz duzmeuz unqswnh, lajmbanj mbangj vunz maij ciengx saek duzmeuz youq ranz. Mboujguenj duzmeuz baenzlawz unqswnh dwggyaez, gou cungj lau, cungj mbouj gamj lumj bouxwnq bae lumh bae umj youq ndaw rungj. Hoeng doxaeu le, gou couh youq ranz ndwi, mbouj okrog bae guhhong. Ngoenz- ngoenz cungj dwg gou nem duzmeuz youq ranz, lau de cix deng ngoenzngoenz nem de guhdoih, baez nanz lainoix goj miz saekdi gamjcingz ne.

Goj naeuz duzmeuz coengmingz, caen dahraix. Baez raen gou gwn doenghyiengh, lumj gwn lwgmak、mienhbau caemhcaiq ndoet raemx, de couh gaenlaeng dwkndundu, hemq “meu meu” mbouj dingz mbouj duenh. Mwngz mbouj vit saekdi hawj de gwn, de gwq ngiengxgyaeuj ngonz mwngz gwq hemq, lumjbaenz ngaeq “hawj di gou”. Vit di hawj de, de ngaemgyaeuj nyouq gonq, maij gwn couh gwn, mbouj maij couh byaijdeuz. Dou gig noix daegdaengq gueng de, cungj dwg gwn ngaiz gwn caeuz seiz vit saekdi hawj de gwn couh ndaej.

De ngah gwn byaekheu caeuq noh. De maij gwn nohcing, mbouj ngah gwn nohbiz, gou cix mbouj maij gwn nohcing. Baenzneix baez nip ndaej nohcing, gou couh vit hawj de gwn. Duzmeuz gvai yaek dai bae, danghnaeuz nohcing nohbiz gyaux de couh aeu nyauj bae nyauj giz biz gaiq noh, ngaemgyaeuj bae nyep giz cing, gwn vanswdswd bw! Mbangjseiz byaekheu mbouj gaeuq soengq ngaiz, hix aeu nip dawh byaekheu ndeu hawj de gwn, mboujnex de couh gwq aeu gyauj daeuj lumh din mwngz, aeu naj daeuj ing ga mwngz.

Gyanghaet hwnqdaeuj, raen de boemz youq gwnz cauq, hemq de cungj mbouj han mwngz. Aenvih gyanghaet dou cungj gwn cuk, cuk mbouj gyu mbouj youz, de mbouj ngah, rox mwngz mbouj miz maz huq ndei hawj de gwn, nyengh mbouj guhsing dam mwngz. Daengz banngaiz gou ronq byaek yaek loengh ngaiz seiz, de couh youq henz din gou cienq bae cienq dauq, “meu meu” nyaengq hemq mbouj dingz, seiz mbouj seiz ngiengxgyaeuj yawj gou. Caen lumj boux lwgnyez cam naeuz “cawj maz byaek ha”, caen cing lumj vunz!

Ngeih. Duzmeuz Ndei Lox Lwgnyez

Dou gizneix miz lwgnyez iq lai, lwgnyez iq goj lai ngah daej. Mboujgvaq, caen geizgvaiq lo, bouxboux lwgnyez yaek daej seiz, daeuj ranz gou ndaej raen duzmeuz couh mbouj daej lo. Ranznden miz boux lwgnyez ndaej song bi, daxbuz de youq ranz daiq, de saek geij faencung mbouj raennaj daxbuz de couh daejngaungau.

Haethaenx, buz de naeuz bae gueng gaeq, caiq rwed byaek mbaet byaek, hemq de youq ranz gou gaen gou saek seiz, de han naeuz “w”. Buz de byaijdeuz lo, gou aeu di mienhbau hawj de gwn, yien de bae rog bakdou guhcaemz, caih de gag maez. Byawz rox, ngamq ndaej geij faencung, de couh mbwq lo, mbouj nyienh lo, gwq hemq “daxbuz daxbuz daxbuz”, gaendwk couh daejlanglang hwnj- daeuj. “Daxbuz bae gueng gaeq ha, yaep ndeu couh ma lo.” Gou sing unq nai de, de cix yied daej sing yied hung, raemxda doekbyoegbyoeg. Gou baenzlawz lox de cungj mbouj dingz, de gaem fwngz gou doq beng doq byaij, yaek heuh gou yien de bae ra buz de. Gou baenzlawz rox suenbyaek ranz de youq gyawz, rox bae gyawz ra?

Doeklaeng, mbouj miz banhfap lo, gou cij ndaej naeuz:“Raeuz bae yawjyawj duzmeuz youq gyawz, bae lwi?” Mbouj rox de dwg mbouj roxnaj duzmeuz roxnaeuz dwg noix raen duzmeuz, ndaejnyi gou baenzneix naeuz, sing daej de iq lo. Gou yien de byaij maranz, caengz byaij daengz bakcauq gou couh hemq “meu meu”, de caemrwdrwd gaen gou byaij, gaenq mbouj daej lo. “Ne, duzmeuz youq henz neix, raen lwi?” Gou doq fwngz vix coh gwnz cauq bae doq heuh “meu meu”, duzmeuz hix “meu meu” han gou. De cimyawj dwk duzmeuz, hix ngw hemq “meu” sing ndeu, duzmeuz hix “meu” han de. Raen duzmeuz han de, de riu lo, angqfwngfwng “meu meu meu” hemq mbouj dingz, yied hemq sing yied hung.

Gou raen de baenzneix sim’angq, bae ndaw gungx dawz aen giuz iq okdaeuj, dwk coh henz din meuz bae. Duzmeuz sikhaek iet cik ga naj daeuj yaek nyauj aen giuz. Gou youh bae aeu aen giuz dauq, de youh ndiengq cik ga naj hwnjdaeuj bae lauz. Couh yienghneix, gou nem duzmeuz caemz aen giuz iq caemz ndaej gig mizyinx, de yawj ndaej bak aj mbouj rox haep bae. Doeklaeng de hix iet fwngz okdaeuj caeuq duzmeuz loengh giuz. Hoeng, de cix mbouj lumj gou yienghneix daeuq duzmeuz, de aeu giuz bae moeb duzmeuz, duzmeuz doq doeksaet ndaej suk aen ndang hwnjdaeuj.

（caengz sat）