Ndwen 7 ngoenz 10, ndaej daengz Ceiq Sang Yinzminz Fazyen dakhawj, Geiz Daihhaj Aen Ban Son’gyauq Faz- gvanh Cuengh Gun Song Vah Fazyen Daengx Guek youz Swcigih Ceiq Sang Yinzminz Fazyen banh haenx youq Gvangjsih Fazgvanh Yozyen haiban. Swcigih Minzcunghveij fucujyin Veih Yungjhungz ndaej iucingj bae caeuq- faenh aen yizsi haiban hwnj dangzgoq daih’it hawj bouxhag.

Veih Yungjhungz youq mwh gangjvah naeuz, vih gvancez doeksaed gij cingsaenz aen hoih hong minzcuz Cunghyangh、Ceiq Sang Yinzminz Faz- yen、Guekgya Minzveij 《Gij Yigen Mizgven Caenh’itbouh Gyagiengz Caeuq Gaijndei Son’gyauq Fazgvanh Minz Gun Song Vah Dieg Minzcuz Caeuq Hong Son’gyauq》 caeuq Guekgya Minzveij daengj roek buveij 《Gij Yigen Mizgven Doicaenh Hong Ganbu Dieg Minzcuz Hag Song Vah》 daengj vwnzgen cingsaenz, bi 2015 doxdaeuj, doengh aen bouhmonz guh- hong minzcuz cunghgyau (saw vah minzcuz) swcigih gaenxmaenx boiqhab Swcigih Ceiq Sang Yinzminz Fazyen, banh le 4 geiz aen banh son’gyauq fazgvanh Cuengh Gun song vah fazyen daengx guek， swnhleih guhsat hong sawqdiemj bingzdingh fazgvanh Cuengh Gun song vah fazyen 12 aen yienh (si、gih) comzyouq Bouxcuengh daengx gih, hai aen hoih doicaenh fazgvanh Cuengh Gun song vah daengx gih bi 2019, cungjgez hong fazgvanh Cuengh Gun song vah geij bi neix daeuj, vih swcigih fazyen caeuq bouhmonz guhhong minzcuz cungh- gyau (saw vah minzcuz) doxgap guh hong dwk roengz giekdaej ndei. Coglaeng, doengh aen bouhmonz guh- hong minzcuz cunghgyau (saw vah minzcuz) swcigih yaek laebdaeb fatok gij cozyung guenjleix caeuq sonyinx hong saw vah minzcuz vunznoix daengx gih, yungh banhfap miz yungh, gaenxmaenx boiqhab、haeujcoengh guh ndei hong son’gyauq fazgvanh Cuengh Gun song vah, caezcaemh doicaenh gih raeuz minzcuz doxgiet cinbu、aenbiengz huzndei onjdingh, vih hwnjguh aen Gvangjsih gyaeundei、saedyienh aen loqsiengj fukhwng guh’ok gungyen engq hung.

Aen yizsi haiban sat le, Veih Yungjhungz gangj dangzgoq daih’it 《Sawvah Minzcuz Gvangjsih Caeuq Gij Daegdiemj Vwnzva De》 hawj bouxhag.

Ciuq cam rox, baez son’gyauq neix seizgan dwg ndwen 7 ngoenz 9 daengz ndwen 7 ngoenz 30, fazgvanh gihcwngz caeuqfaenh son’gyauq gungh miz 40 vunz（ndawde Gvangjsih 38 vunz、Yinznanz 2 vunz）. Baez neix son’gyauq neiyungz cujyau miz son- gyauq swhsiengj cwngci suciz, hwnjguh aen doih fazgvanh minzcuz、fungsug caeuq gimqgeih Bouxcuengh, yenzgiu gij lizsij vah Bouxcuengh, swnjcienz baujhoh fwen Bouxcuengh, gij fuengfap caeuq yisuz hong saemjbuenq dieg minzcuz daengj.

（Cangh Haijyingh Yauz Wnhmingz）