Seizndat ndatfwtfwt, ndaw suenva boux lauxsae duiyouh Hoz Daci Sanglinz Yen Dafungh Cin Lenzvahboh youh gyalai loh gingjsaek gyaeundei ndeu. Ndwen 7 ngoenz 6, Veiz Youjcang bouxswnjcienz Cungguek dandog Fwencuengh “seiq roek lienz” aen yienh neix gagmiz haenx, daiq doih bae ndaw suen goepingj MV 《Cingz Go Nuengx Mbanjcuengh》, vih fungfouq gij vwnzva neihanz aen dieg seiqgyaiq gyaeusouh aen yienh neix, bangrengz lijyouzyez aen yienh hwnj mbaeklae moq ok rengz.

Fwen “seiq roek lienz” dwg Fwencuengh, seizneix dan Namzningz Si Sanglinz Yen Hangyenz Cin miz, ndaej lied baenz swcigih gaep feihvuzciz vwnzva yizcanj. Geij bi neix daeuj, Sanglinz Yen ndaej cauhlaeb baenz aen yienh lijyouz daegsaek Guengjsae, cingq haenqrengz cauhlaeb dieg guhyiengh lijyouz gizdieg guekgya, haenqrengz hwngfat gij vwnzva Fwencuengh ndawbiengz.

(Lanz Couh/蓝 洲)