Seizcin, gou yawjraen dah lwg- nyez ndeu ndwn youq yangzdaiz, ndaw fwngz de gaem diuz faexdwngx ndeu, gyaeuj faexdwngx ndeu cug geu cag nding gyaeundei ndeu, geu cagnding mbin youq rog conghcueng. Gou byaij gyawj bae cam dah lwgnyez neix de yaek guh maz. De riunyingnying dap naeuz:“Gou yaek ep duzmbaj.” Gou ngeizvaeg dwk cam de baez ndeu:“Gou maj baenzneix hung, baez daih- it dingqgangj naeuz ep duzmbaj, caiq gangj mwngz yaek aeu maz bae ep ne?” Dah lwgnyez neix riuhoho gangj naeuz:“Gou mbouj dwg ep ndang duzmbaj, cix dwg ep gij haengjheiq duzmbaj.”

Gawq vah neix hawj gou ngeix hwnj daxboh gou. Daxboh gou gyaez sij faenzcieng geiq bae bause, mizseiz ndaejhoengq hix bae ep bya. De banhaet okdou, daengz yaek laep cij dauqma ranz. Miz baez ndeu, gou yawjraen de riuj aen gez bya hoengqhanghang dauqma, ndawde duz bya ndeu cungj mbouj miz. Hoeng, doeklaeng daxboh lijdwg eu fwen cod roen cod loh bae ep bya. Gou ngeix mbouj doeng, couh yaemjsisi byaij bae cam daxboh:“Boh ha, mwngz ep bya baenzngoenz baenzhwnz, aen gez cungj byouqbyengbyeng ne, saek duz- bya cungj ep mbouj ndaej, mwngz baenzlawz lij angq baenz yienghneix ne?” Daxboh gou angqfwtfwt gangj naeuz:“Dahlwg ha, mwngz lij saeq mbouj rox, ep bya dwg gou yaek ra aen dieg caemrwgrwg ndeu bae ngeix saeh, bya mbouj dot geu ngaz gou, gou hix mbouj miz banhfap. Hoeng, gou ep dwk haengjheiq, vahsug gangj ndaej deng, ‘miz cienz nanz cawx ndaej haengjheiq’. Caih gou miz mbouj miz cienz, ngoenzneix gou gaenq ndaej haengjheiq lo, mwngz naeuz gou baenzlawz mbouj simhai ne?”

Doeklaeng, gou riengz daxboh bae ep bya, raen de yaek dauqranz seiz, gawqyienz dawz geij duz bya ndaw gez cuengq dauq haeuj ndaw dah bae. Laxlawz, doiq daxboh daeuj gangj, ep mbouj ep ndaej duz bya mbouj youqgaenj geijlai, ceiq youq- gaenj dwg de ndaej bae ep bya ndaej haengjheiq lo, neix beij ndaej gwn nohbya lij habhoz.

Caen dahraix, mwngz yawj gyoengq vunz ndaej gyaeusouh, nanz- dauh bouxboux cungj ndaej gwndaenj ndei caez? Mbouj dwg ne, vihmaz gyoengqde lij lix ndaej baenzneix nanz ne? Gou nyinhnaeuz dwg gyoengqde ndaej gwn maz daenj maz cungj mbouj gvaqsim, miz geijlai ngaenz yungh hix mbouj haeuj uk, gag roxnyinh rimhoz caemhcaiq haengjheiq couh baenz lo.

Haengjheiq dwg duj va ndaw mingh hai ok, de hawj raeuz mbouj- guenj youq gyawz cungj youq ndei gwn van, baenzngoenz riuhoho.