Siengj mbouj daengz ciengx gaeq lij miz gij saeh mizyinx dem. Seizgonq, gou raen bouxlaux ciengx gaeq aeu ciengx baenz bi, duzgaeq ciengx baenz bi haenx noh net youh van. Seizneix, gou youq ndaw singz dingq vunz gangj ciengx gaeq ngamq sam seiq ndwen couh ndaej dawz bae gai, cungj gaeq neix noh naemz lij haeusing dem. Gou baenzlawz cungj siengj mbouj daengz, duzgaeq souhmingh raez daengz 10 lai bi, vunzraeuz ngamq ciengx saek bi baedauq couh gaj gwn lo.

Gou doeng naemj sae naemj, naemj daengz diuz mingh duz gaeq- boux geq neix, ngoenzlaeng mbouj rox de dwg geq lai le gag dai, roxnaeuz deng vunz gaj daeuj gwn noh?

“Go ha, mwngz doegsaw lai naemj lai lo!” Beixnuengx riu gou you vunz lajmbwn couh suenq lo, lij you daengz duzgaeq bae.

Gienh saeh mizyinx daihngeih, dwg gangj aen ranzlaeuz moq ndeu. Seizneix, vunz lajmbanj ra ndaej ngaenz le cungj hwnq ranz moq. Vunz mbanj gou hix miz haujlai vunz ra ndaej ngaenz, ndaw mbanj ca mbouj lai ranzranz cungj hwnq ranz moq. Yienznaeuz ranz moq lai lo, hoeng ndaw mbanj ranz nem ranz、laeuz dep laeuz, daj gyae yawj gvaqbae raen lumj habfeiz doxdab yienghhaenx, yakyawj youh mbouj ndei youq geijlai. Miz vunz yienghneix gangjriu: Ranz- gwnz gwn maenz le ok aen roet ndeu, ranzlaeng cungj dingq ndaej nyi liux. Caiq gangj ha, danghnaeuz song gvanbaz hwnj mbonq gangj vah caiq guh di gijmaz dem, singyaem hung di cungj deng vunz ranznden dingqnyi liux.

Lajmbanj hwnq ranz mbouj miz doengjit gviveh, vunzmbanj siengj baenzlawz hwnq cungj ndaej, yiengh- neix couh hwnq baenz gak ranz gak yiengh luenhcabcab lo. Mbanj gou haujlai ranzlaeuz caemh dwg hwnq baenz luenhcabcab, baenzlawz yawj cungj yawj mbouj hwnj da. Hoeng miz ranz ndeu caeuq vunz mbouj doengz, ranz neix youh sang youh lengj yienjda raixcaix, gig lumj ranzlaeuz ndaw singz, cungj ranzlaeuz ndaw singz heuhguh bezsu, bengz daengz aeu geij bak fanh cij cawx ndaej. Ranzlaeuz neix lumj bezsu lai, sang sam caengz buenq, najranz daengj song diuz saeu hung, gwnz saeu nem rindalijsiz, gij rindalijsiz gig dijbauj, boux gig miz cienz cij sij ndaej cawx cungj huq bengz neix daeuj nem diuz saeu. Ranzlaeuz lengj neix bangxciengz caemh mbouj doengz ranz vunz, dwg aeu cungj raemxduzliu daeuj daz, cungj raemxduzliu neix dijbauj lai, vunz ndaw singz hwnq ranzlaeuz sang cij yungh cungj raemxduzliu daeuj daz bangxciengz. Bangxciengz daz gvaq cungj raemxduzliu neix le, muengh gvaqbae youh lengj youh lwenqda. Yawj gvaq bangxciengz lwenqda ranz neix le, caiq yawj bangxciengz ranz vunz couh yakyawj lai lo: Bangxciengz vunzmbanj cungj nem gij cienmeng mongmumu, baez yawj couh rox dwg huq lanhcienh mbouj dijcienz. Miz mbangj ranz caengz ra ndaej doh cienz, hwnq ranz le caengz miz cienz cawx cien nem bangxciengz, bangx- ciengz aen ranz couh lumj uq haexvaiz yienghhaenx yakyawj raixcaix.

Dingqgangj, ranzlaeuz lengj neix lienz hwnq lienz dajcang gungh yungh bae 88 fanh maenz.

“Seizneix, ranzlaeuz ceiq lengj mbanj raeuz dwg ranz neix lo.” Beixnuengx doq gangj doq ndwnj myaiz byoegbyoeg, lumjnaeuz hoz- haenz ranz vunz neix lai lo. “Ranzcawj neix youq baihrog guh gunghcwngz fatcaiz lai le, de youq ndaw singz cawx ndaej ranz moq, cawx miz ci’gyauzceh bengz heuhguh Bwnhciz, daengx ranz cungj youq ndaw singz youq. Ranz de youq ndaw mbanj hwnq aen ranzlaeuz lengj le, bi daengz byai cij miz sam nyied sam maranz baiq coj ninz song sam haemh.”

Gou dingq le miz di fug lo: Ndaw singz haujlai vunz cungj nanz rom ndaej 88 fanh maenz ngaenz cawx ranz, ranz vunz neix mboujdan miz ngaenz lai youq ndaw singz cawx ranz cawx ci, lij sai ngaenz lai youq ndaw mbanj hwnq ranz lengj, caemhcaiq ranzlaeuz ndaw mbanj bingzseiz vut hoengq dem.

“Daeggo, mwngz youq ndaw singz hwnjban geijcib bi lo, dingqnaeuz lij guh boux lingjdauj iq dem, baenzlawz gangj cungj beij dou youq ranz guh hongnaz ra ndaej cienz ha? Seizneix aen ranzcoj mwngz yaek lak lo, mwngz seiziq ndaej youq gvaq ranzcoj geij bi ha, mwngz wngdang sai di cienz lid aen ranz gaeuq bae, youq dieg haenx caiq hwnq aen ranzlaeuz moq. Mwngz caemh dingqnyi bouxlaux gangj gvaq, ranzcoj lak le, lwglan couh nanz ra ndaej gwn lo.” Beixnuengx miz sim lai cij yienghneix caeuq gou gangj.

Gou youq ndaw singz hung hwnjban geijcib bi dahraix, hoeng ngaenzhong gou ngamq doh gwn doh yungh, geijcib bi gvaqdaeuj cungj mbouj lw maz cienz, yienghneix gou cungj mbouj naemj gvaq aeu sai cienz dauqma ndaw mbanj hwnq ranzlaeuz moq gvaq.

Daengz seizneix, gou cungj mbouj rox yienghlawz caeuq beix- nuengx gangj cij ndei.

（ sat）