●Ndwen 7 ngoenz 1, Dunghlanz Yen Sanhlung Yauzcuz Yangh youq Lung- ningz Cunh Mbanjyauz miz minzsuz fungcingz aennyenz haenx guh aen hozdung angqhoh “cietcuzcu” bi gvaq baez, beixnuengx Yauzcuz ndang daenj buhvaq moqsag gyaeuget doxcomz giz ndeu, ciengqgo diuqfoux caez angq- hoh ngoenzciet, hozdung lai cungj lai yiengh yinx ndaej haujlai bouxhek caeuq vunzlai henzgyawj daeuj yawj.

(Veiz Fungh)

●Geij bi neix daeuj, Lingzyinz Yen Lozlouz Cin doenggvaq cwngfuj sonyinx、vunzlai gag guh、cwngcwz doidoengh、gohgi daiqdoengh、ngaenzcienz bangfuz daengj, guhhung ndaem gonengz- nuengx ciengx nonsei, hawj nungzyez gyalai yauqik、vunzguhnaz laisou. Ciuq cam rox, aen cin neix bi 2019 miz 260 lai ranz ciengx nonsei, ranz ciengx nonsei bi bingzyaenz souhaeuj daih’iek daengz 5 fanh maenz baedauq.

(Veiz Senh)

●Mboengqneix, Loz- cwngz Mulaujcuz Swciyen Aen Lenzhozvei Mehmbwk bae Aen Hozcozse Ciennieb Vunzguhnaz Dajciengx Daj- ndaem Fanh Ranz Miz Lozcwngz guh hozdung gangj, sonyinx mehmbwk gungzhoj giendingh gij saenqsim caeuq gietsim dwkhingz gungzhoj、gaijbienq yienghsiengq doek- laeng, vih dwkhingz ciengz ciengq vut gungz gunggeng、saedyienh aen moegbiu cienz- mienh hwnq baenz aenbiengz siujgangh roengzrengz.

(Mungz Cwnghswh)

●Geij bi neix daeuj, Denzyangz Yen Dungcing Cin Nendangz Cunh baengh bangfuz mak、yungh ciengj lawh bouj daengj banggungz cwngcwz, gujli ranzgungzhoj haenqrengz ndaem makgam、makgaivaiz daengj canjnieb miz daegsaek, bi 2018 mued daengx cunh dajndaem mak miz daegsaek najdieg 138 moux, canjnieb cwgoemq cingzsoq daengz 90.8%, cunh cizdij ginghci souhaeuj 6.22 fanh maenz, saedyienh daengx cunh ndaej vut gungz.

(Danz Cwngyangz)