Lwnh lwgmbwk lwgsai,

Cungj wnggai rox laex,

Bohmeh raeuz cingzngeih,

Caen aeu geiq ndawsim.

Gienq raeuz gyoengq hauxseng,

Yaek aeu hengz hauqdauh,

Aeu hauqgingq bouxlaux,

Daengzcog cauh fukheiq.

Miz di gvengq mehboh,

De roz couh lumj fwnz,

Mbouj hawj daenj caeuq gwn,

Byaj gwnzmbwn couh bag.

Gienq lajmbwn vunzraeuz,

Cungj aeu gyaez bouxlaux,

Aen bohmeh mbouj bauq,

Daengz sou laux couh raen.

Guk mbouj gwn ndwen loeg,

Miz goek cij miz byai,

Daih bohlaux ndei lai,

Cog lwggvai goj ciep.

Vunzvunz aeu gingq laux,

Boh gaeq mbouj ndaej wngj,

Ndwen loeg guk mbouj gwn,

Cog daengz mwngz guh meh.

Vunzvunz aeu gingq laux,

Doengzcaez cauh fukheiq,

Daihdaih cienz roengzbae,

Geiq cingzngeih bohmeh.

Ciengx gyoengqlwg daengz laux,

Bohmeh cauh vuenyungz,

Daj iq gyang fwngz bungj,

Baenz hung caen mbouj vei.

Lwglan boiz cingzngeih,

Yienghneix guh cij ndaej,

Daengx ranz vunz doxgyaez,

Diemz lumj caez gwn dangz.

Bohmeh lumj diendeih,

Guh lwg ngeix youq sim,

Niemh bohmeh aencingz,

Bouxwnq hix gingq dauq.

Bohmeh ciengx raeuz hung,

Feiq sim youh gwn hoj,

Lajmbwn vunz caez rox,

Bohmeh deng nanh lai.

Bohmeh bingh gwnz congz,

Ciengz dauq ngonz saek caenh,

Dangh goj miz fukfaenh,

Gaenx ndenq raemx ndenq gwn.

Bohmeh bingh gwnz congz,

Ma ngonz gaenx fugsaeh,

Ciengx raeuz hung baenzneix,

Aeu boiz ngeih boiz aen.

Miz naed bya gaiq noh,

Lai hawj bohmeh gwn,

Daengz de dai roengz gumz,

Vaiz caeq gwn mbouj ndaej.

Dwen daengz raemxda langh,

Ndok caeuq namh guhdoih,

Soengq bohmeh hwnj ndoi,

Yienghlawz boiz cingzngeih?

Meh bae mbanj bae haw,

Ok bakdou bae ngonz,

Daengz gvaqseiq roengz congh,

Vah baenzdong caengz gangj.

Bohmeh lij youq ranz,

Ndaej gwn can rox can,

Aeu caensim bae ganq,

Daengz laeng nanz ndaej raen.

Eu lai lij miz lai,

Doengzcaez baij dauhleix,

Eu fwen daengz gizneix,

Daengq gak boux geiq maenh.

（sat）