Ngoenz ndeu, gou bae ndaw yienhsingz banhsaeh, muengz hwnj muengz roengz baenz haet le, lij caengz ndaej gwn ngaiz, iek ndaej naengdungx nem laenghwet bae.

Sawqmwh yawjraen doiqnaj miz aen diemq hojgoh he, boux fuzvuyenz raen gou yienghneix dinghdingh yawj, couh ganjgip byaij ok bakdou daeuj riunyumnyum naeuz:“Nuengx a, aen diemq dou byaeknoh ndeigwn, youh cingq guh hozdung, bienzngeiz lai bo, mbouj haeujdaeuj cimzcimz?”

Dingq de baenzneix gangj, gij heiqhom yinx ndaej gou myaiz yaek rih okdaeuj lo, baenzneix couh haeuj- bae lo. Fuzvuyenz dawz mbawdiemj- byaek gvaqdaeuj, gou ngeix baenz buenq ngoenz cij diemj ndei byaek gwn. De ciep gvaq baez yawj gig ngeixngwg cam:“Mwngz baenzlawz cij aeu byaekheu ya, mbouj miz saekdi noh ne?” Gou mbouj ndei eiqseiq naeuz:“Gou lau biz.” Fuzvuyenz riu naeuz:“Gwn hojgoh aeu miz noh cij mizyinx.” Gou ngauzngauz gyaeuj, sawqmwh yawjraen laeng bakdou miz aen caengh ndeu. Fuzvuyenz sikhaek vuenheij hwnjdaeuj naeuz:“Neix dwg aen diemq dou ngamq cawx dauq, caenghnaek mbouj sou cienz.” Gou dingq le sim’angq raixcaix, duenh seizgan neix gou itcig mbaet bak siuj gwn, hix mbouj rox miz mbouj miz yungh, seizneix bae caenghcaengh yawj. Ndwn hwnj gwnz caengh baez yawj, angq ndaej yaek saetdiuq hwnjdaeuj, gou mbaeu 5 gaen lubw!

“Fuzvuyenz, dem deb nohsam- caengz daeuj!” Gou ganjgip vad fwngz coh de hemq hwnjdaeuj. Caen liuh mbouj daengz, ngoenzneix gou goj ndaej cuengq bak gwn baez noh lo, donq haeuxngaiz neix gou gwn ndaej sangj dangqmaz.

Gvaq le geij ngoenz, gou byaij gvaq aen diemq gai yw ndeu, yawjraen bakdou hix daengj miz aen caengh he, gipmuengx buet gvaqbae caengh. Dai lo, gou caen mbouj saenq aen lwgda gou: Ngamq gvaq geij ngoenz youh naek geij gaen la? “Aen caengh sou cinj mbouj cinj?” Gou miz di hozndat cam boux mehmbwk gai yw：“Ngoenzgonq gou youq aen diemq hojgoh caengh cij miz 100 gaen ndwi!”

Dingq gou yienghneix hoed, de riu ndaej raemxda lae bae:“Dangh- naeuz aen caengh diemq hojgoh mbouj caengh mwngz mbaeu di, mwngz lij gamj lai gwn byaeknoh lwi? Dou caeuq de mbouj doxdoengz, mboujnex mwngz cawx di yw gemjlauz, gwn yw gemj ndaej vaiq.” Raen gou ngeix- laengx, de youh naeuz:“Mwngz goj cawx di yw sawqsawq, gvaq geij ngoenz caiq daeuj caengh couh rox lo.” Gij vah de gangj ndaej hawj gou sim fubfed dwddwd, baenzneix couh mbon cienz okdaeuj cawx.

Byaij maranz, gou yied siengj yied mbouj doiq, aen caengh diemq gai yw mbouj dwg vihliux hawj gou cawx yw cij daegdaengq caengh gou naek di ba? Gou doeksaet dwk ndangcwg caez, seizneix ceiq youq- gaenj dwg bae cawx aen caengh cinj ndeu dauq. Gou ganjgip buet bae doiqnaj aen sanghcangz, daengz gij dieg gai caengh, sijsaeq genj baenz buenq ngoenz, cam naeuz:“Lauxbanj, aen caengh mwngz cinj mbouj cinj ha?” Bouxgaicaengh dacaengz gou baez ndeu:“Dangyienz cinj, mbouj cinj beg soengq mwngz aen ndeu.”

Baihnaj deng gwn vei, gou gvai lai lo, naeuz:“Mwngz baenzlawz cingqmingz aen caengh mwngz cinj ne?” Bouxgaicaengh fwngz vix laj laeuz naeuz:“Mwngz bae cauhsi iq lajde cawx daeh haeux cang ndei miz 5 gaen daeuj, caengh baez ndeu couh rox lo.” “Hoeng, 5 gaen mbaeu lai, cuengq youq gwnz caengh lau mbouj hwnj ba?” Gou lij ngeizlaengx.

“Yienghneix ndei ha.” Boux- gaicaengh riuhehe naeuz, “Mwngz umj daeh haeux caengh gonq, caiq cuengq daeh haeux bonjfaenh gag caengh baez ndeu, song baez doxgemj, ca 5 gaen couh mbouj loek lo!”

Gou baez ngaekgyaeuj, aen banhfap neix caen ndei. Gou umj daeh haeux 5 gaen angqvauvau cingq yaek hwnj laeuz, sawqmwh myaeg raen bouxgaihaeux dwk denva, youq baih- laeng biu daeuj coenz vah ndeu:“Gvan mwngz caen rox guh seng’eiq, gai aen caengh, lij swnh gai bae daeh haeux dem……”

Aen sim gou daengj baez ndeu, youh mauh ok hanhheu daeuj:“Mehmbwn ha, baezneix gou youh deng yaeuh lo!”