Ndwen 6 ngoenz 15 daengz ngoenz 16, aen ban son’gyauq Sawyauz gaiq daeuz bi 2019 Sihlinz Yen youz Sihlinz Yen Minzyijgiz cawjbanh, Aen Yenzgiuvei Vwnzva Ndawbiengz Yauzcuz Sihlinz Yen ciepbanh haenx youq Sihlinz Yen Dangjyau haiban, baez son’gyauq neix aeu hag 《Aen Diuzlaeh Hong Saw Vah Minzcuz Vunznoix Gvangjsih Boux- cuengh Swcigih》 caeuq hag Sawyauz ndeindei giethab. Beixnuengx Yauzcuz daj Sihlinz Yen caeuq Dwzbauj Yen daeuj haenx caeuq beixnuengx Bouxcuengh、 Bouxgun(gak boux ndeu) yinx Sawyauz haenx gungh 87 boux caeuqfaenh baez son’gyauq neix.

Mwh son’gyauq, Baksaek Si Denzlinz Yen Vangz Gveibingz lauxsae son’gyauq Sawyauz daj gij liglaiz Sawyauz、gij faenloih nga vah deihfueng、dieg faenbouh、singmeh、yinhmeh caeuq singdiuh nem lienh- doeg saw daengj fuengmienh, haeuj- laeg gangjgej le gij gveihcwz raiz Sawyauz、gij giekdaej yijfaz caeuq sawloih vah deihfueng gak nga.

Baez son’gyauq neix aeu hag 《Aen Diuzlaeh Hong Saw Vah Minzcuz Vunznoix Gvangjsih Boux- cuengh Swcigih》 caeuq hag Sawyauz ndeindei giethab, haemq ndei gvancez hengzguh gij fapgvi vah minzcuz; youq mwh son’gyauq lij yungh gij fwen Yauzcuz haengj dingq gyaez yawj haenx guh sonhag, hawj bouxhag mboujdan hag Sawyauz, hix hag Fwenyauz; doengzseiz hag gij gveih- cwz raiz Sawyauz le, fanhoiz mbangj sei daihneix ngaih rox haenx, gyagiengz gij yinxdaeuz sonhag, hawj bouxhag hag ndaej couh yungh, lai rox lai yungh.

Baez son’gyauq neix yinx daeuj 8 boux hagseng caeuqfaenh, ndawde boux ceiq iq 8 bi, lijmiz bouxgeq 75 bi goj daeuj caeuqfaenh son’gyauq. Youq son’gyauq 2 ngoenz neix, bouxhag haemq vaiq hag rox singmeh、yinhmeh、singdiuh Sawyauz gyoepyaem daengj giekdaej cihsiz, caeuq gij gveihcwz gyoep doeg raiz Sawyauz gyoepyaem.

(Luz Yen)