Seizneix de lij lix,

Hawj gwn di couh van,

De dai haeuj yaemgan,

Mbouj ma cam gwn faenh.

De lix couh hawj gwn,

Wng boiz cingz boiz ngeih,

Daengz nienzlaux gvaqseiq,

Dauqngeix mbouj ienqhoij.

De lix mbouj hawj gwn,

Dai fwngz uet da daej,

Guh gyaj cingz gyaj ngeih,

Seiqvunz vaih daengz ndok.

Miz roen ok bakdou,

Hix duh sou mingzfaenh,

Ngoenz siu yieng daengz haemh,

Hix mbouj maengx ma gwn.

De lix cix mbouj gyaez,

Daengz dai caeq rim daiz,

Daej ndaej lae mug myaiz,

Hix gik caiq ma gwn.

Miz geij ciuh bohmeh,

Caih gak boux deq sim,

Hawj de gwn mbouj imq,

Naq aeu cin ndang bae.

Lwnh seiqneix seiqlaeng,

Vunzvunz baengh bohmeh,

Daj iq daengz lauxgeq,

Ngoenzngoenz rox deq raeuz.

Seng gonq youh ciengx laeng,

Bohmeh caengz vei mwngz,

Dangh raeuz rox guh vunz,

Couh hawj gwn hawj daenj.

Miz naed bya gaiq noh,

Aeu hawj bohmeh gwn,

Daengz de dai roengz gumz,

Mbouj ma gwn faenh mwngz.

Bohmeh laep lwgda,

Couh bae ma yaemgan,

Lumj raemx doek roengz angq,

Daej fanhdaih mbouj ma.

Seizde yienznaeuz iq,

Ngoenzngoenz lij fwngz umj,

Bohmeh dai roengz gumz,

Mbouj lumz gij aencingz.

Meh seng raeuz ndawndwen,

Byaek ndaw suen cungj geih,

Bohmeh raeuz gvaq seiq,

Geiq gyoengqde baenzciuh.

Bohmeh haeuj yaemgan,

Daengx ranz vunz daiq hauq,

Bohmeh ciengx raeuz laux,

Raeuz aeu bauq aencingz.

Aen faex youq gyang ding,

Sim in mbouj daengz mwh,

Lwglan daejww,

Bohmeh wj dauqma.

Daengq lajmbanj beksingq,

Aeu hauqgingq bohmeh,

De laux mbouj ndaej deq,

Cij geq fwngz gvaq ngoenz.

（caengz sat）