“Mehmbwn naeuh neix ha, cien ngoenz fanh ngoenz mbouj roengz, couh daegdingh ngoenzneix soh mwtcupcup.” “Mwngz nit couh bah lo, mwngz gaej doek fwn luma.” “Mwngz yawj, gij rumz neix coi ndaej doengh gofaex couh yaek deng riuj hwnj daeuj lo.” “Hai! Gij rumzraq neix, lumj gyoengq guk iek nei, daj ndaw ndoengfaex bongh okdaeuj dwksausau ne……” Meh Dahlingz lumj aen lwggyangq nei youq ndaw ding baenq bae baenq dauq, ndaw bak gag namsoebsoeb.

Boh Dahlingz ndwn youq bakdou “bada bada” dwk boep ien, nyaenx mbouj ndaej nam de saek coenz:“Byawz heuh mwngz hawj de youq doenghgij mbwn fangz neix dawz bae gai!” “Baenzlawz dwg gou heuh de bae ne, de gag naeuz de aeu dawz bae gai! Caiqgangj, de okbae gaxgonq lij caengz doek fwn lw. Yienznaeuz haetneix de ma daengz ranz caengz ndaej gwn gaemz raemx gvaq, hoeng mwngz rox de bae haw mbouj bae aeu saek vanj faenj daeuj gwn remj ndang bw!” Song gvanbaz youq ndawranz couh yienghneix mwngz coenz gou coenz doxnyangq.

Bohmeh Dahlingz bi’neix gaenq miz 60 lai bi lo, miz song boux lwg, caeux couh dayoz bizyez gungh- coz le. Bonjlaiz songde wnggai yiet- naiq lo, hoeng, songde cungj mbouj nyienh dingz roengzdaeuj, lij ndaem di lwgmak dem. Dahlingz guh lauxsae son cuhcungh, de youq ndaw singz son saw, ngamq cuengq hanzgyaj ma daengz ranz, daxmeh gangj, gij lwgmak neix aenvih mbouj gaj non, naeng raiz, vunz cungj mbouj haengj aeu. Dahlingz dingq le, nai naeuz:“Mwngz simdingh di, gaej you, mwngz cij guenj seb swiz ninz, gou gag miz banhfap.” “Hai! Lwg ha, cieng couh yaek daengz lo, gij lwgmak cungj caengz gai ndaej bae saek aen, gou baenzlawz youq ndaej onj ne?” Dahlingz maz cungj mbouj gangj, sikhaek hai cisamloek bae reih raed lwgmak couh daeh hwnj haw bae gai lo.

“Gai lwgmak ho! Gai lwgmak ho! Gag ndaem mbouj cuengq gij yw gaj non! Cimz gonq caiq cawx, mbouj van mbouj aeu ngaenz!” Gij sing diemzsisi Dahlingz youq ndaw honghhaw hod- heux dwk, goemq gvaq le gij sing rumznit bongj, gyoengq vunz menh- menh humx gvaqdaeuj. Hoeng, miz di vunz yawjraen gij lwgmak naeng raiz, mbouj ndeiyawj, couh cienq ndang deuz lo; miz di vunz ndwn youq gag namboebboeb:“Dah neix naeng hau noh maeq, cikfwngz hau seuq, baenzlawz dwg boux dajndaem, wnggai dwg bae buenq gij mak naeuh bienzngeiz daeuj yaeuh vunz ba!” Miz mbangj boux bohranz roxnaj de mbouj rox cingzgvang hix nyaeuqnyaeuq ndaeng naeuz:“Hw hw! Boux lauxsae hix daeuj gyaeuj haw gai huq! Vanzlij rox aeu mak naeuh daeuj yaeuh vunz dem bw , dwgriu lai lo!”

Gij vah neix haeuj dujrwz Dah- lingz, de riunyumnyum naeuz:“Hi hi…… Caen bienq gyaj mbouj ndaej, gyaj bienq hix caen hix hoj! Yaep dem sou couh rox lo, daengzseiz gou aeu sou cienq dauq ra mbouj miz!” De couh dawz soujgih daeuj fat baengz- youxgienj: Gou vih le hawj caezgya ndaej gwn lwgmak cuengqsim, couh daengq bohmeh gou ndaem mak seiz, gaej cuengq vafeiz, lai cuengq di bwnhranz, cingznyienh noix sou di hix mbouj dwk yw gaj non. Seizneix lwgmak baenz gwn lo, yienznaeuz naeng raiz di, mboujgvaq, gwn van dahraix! Vih hawj bohmeh gou ndaej simnet gvaq cieng, gou couh mbouj- guenj fwn doek, seizneix rag daeuj haw gai, byawz yaek siengj cawx, daeuj cimz gonq, hab bak le caiq aeu, mbouj aeu ngaenzsoengqhuq soengq daengz ranz.

Dahlingz bingzciengz guh vunz unqsienh, gyoengq baengzyoux yawj- raen le, cungj haenh de dwg boux simndei、boux lwgsau hauqswnh ndeu. Gyoengq baengzyoux youh bang de cienq fat, lij daengq de gaej dawz bae haw gai lo, hix mbouj aeu soengq daengz ranz, deq mbwn gvengq le, gyoengqde gag hai ci daengz ndaw reih bae aeu, dang guh bae lijyouz baez ndeu.

Vunzndei gag miz roen byaij. Ngoenz daihngeih, rumz dingz daeng- ngoenz hix loh ok gij najriu lo. Gyoengq baengzyoux caen hai ci “huhu” daeuj dahraix. Gyoengqde roengz ci couh haeuj reih bae cimz, cungj ngaekgyaeuj naeuz van gvaq dangz, gwn aen liux ngeix aen moq. Ciepdwk sikhaek bongh haeujbae ciengj raed lwgmak, lumjnaeuz mbouj aeu ngaenz nei. Yaep ndeu, geij moux lwgmak couh gai caez lo.

Meh Dahlingz ndwn youq gyaeuj reih riu ndaej bak cungj haep mbouj hwnjbae, lij gag naeuz:“Dahlingz gou caen miz banhfap dahraix bw! Seizneix gou sim ndaej dingh lo! Gvaiq mbouj ndaej bouxgeq naeuz boux rox saw hoj deng vei, soengq dahlwg neix bae doegsaw ndaej dij lo!”