Ginggvaq caepcawq ca mbouj geijlai buenq bi, mboengqneix, denyingj Vahmauznanz 《Cibbet Dungcunh》 youz Vanzgyangh Mauznanzcuz Swciyen Minzcunghgiz cujciz hoizguh haenx cingqsik loegguh, gujsuenq bineix ndwen 7 banh aen yizsi cuengqingj baez nduj.

Ciuq cam rox, hoizguh denyingj 《Cibbet Dungcunh》cujyau naemj daengz sam aen fuengmienh lajneix: It dwg《Cibbet Dungcunh》 heiqcingz yungh aen canloz guekgya hengzguh cinjcing banggungz guh gij beigingj gojgaeq, doenggvaq langhbaij lajmbanj Sienghsih Huznanz youq mwh hengzguh cwngcwz banggungz, gyoengq vunz- mbanj swhsiengj gvanhnen caeuq gvaq ndwenngoenz miz bienqvaq hungloet, yienh ok conzdungj vwnzva caeuq swhveiz daihneix doxbungz caeuq doxyungz, yinx hwnj gyoengqvunz ngeixnaemj baenzlawz vut gungz. Bineix dwg bi Vanzgyangh daengx yienh vut gungz duet mauh, aeu haenqrengz senhconz gij fuengcim cwngcwz vut gungz gunggeng Dangjcunghyangh、Gozvuyen, hoizguh bouh denyingj neix ndaej gikfat gij saenqsim caeuq gietsim ganbu ginzcung gak cuz Mbanj- mauznanz dwkhingz vut gungz gung- geng, bangrengz vut gungz gunggeng. Ngeih dwg denyingj yungh “laeb ceiq、laeb ndang、laeb hengz” guh cingsaenz haedsim, yienh ok gij haemzhoj caeuq gij buekguh geij daih vunz Cungguek. Hoizguh baenz denyingj Vahmauznanz, ndaej gikfat ginzcung gak cuz Mbanj- mauznanz fatyiengz gij cingsaenz dwgrengz buekguh, iuheuh ginzcung gak cuz daengx yienh caezsim doxgiet, doxrex doxbang, haenqrengz hwnjguh lajmbanj moq vuenyungz gyaeundei. Sam dwg denyingj gaenjndaet hopheux gij vwndiz “sam nungz” nungzyez、lajmbanj、vunzguhnaz Dangjcungh- yangh caeuq Gozvuyen gig haeujsim neix, daezcaiz haeujgyawj lajmbanj、haeujgyawj vunzguhnaz、haeujgyawj ndwenngoenz. Hoizguh baenz denyingj Vahmauznanz, mizleih daezsang gij suijbingz ndwenngoenz vwnzva caeuq swnjcienz minzcuz vwnzva dieg comzyouq minzcuz vunznoix. Doengz- seiz, hoizguh denyingj Vahmauznanz dwg hangh saehnieb goeng’ik ndeu, dwg gij gunghcwngz vwnzva leih lwgminz, doiok gij cozbinj denyingj neiyungz moqsag、gaengaenj yamqdin seizdaih moq, engq ndei hawj gij cingsaenz vwnzva aeuyungh lai caengz、lai fuengmienh、lai yiengh ginzcung Mauznanz ndaej habhoz.(Mungz Siyiz)