Lauxsae, miz gienh saeh ndeu gou itcig mbouj gamj dangqnaj doiq mwngz gangj, ngoenzneix gou giet- dingh sij roengzdaeuj lwnh mwngz nyi.

Miz baez ndeu dwg hwnj dangz suyozgo ndeu, lauxsae mwngz anbaiz cienz ban gaujsi. Gou gig vaiq couh guh sat lo, yawjyawj seiqhenz, gyoengq doengzhag lij ngaem gyaeuj sij sigenj ne, caiq yawjyawj faenh sigenj bonjfaenh, sij ndaej caezcingj seuq- cingh, genjcaz gvaq baez ndeu le hix mbouj raen miz gijmaz loekcak. Baez gaujsi ngoenzneix caen dwg yungzheih lai lo. Gou nyaenx mbouj ndaej daekeiq hwnjdaeuj, ndaw sim caeg angqvau. Mbwq lai mbouj rox guh gijmaz, gou couh boenzloengh hwnj bitganghbiz caeuq gaiqgaucat, naengh ndwi caj roengzdangz.

Banringzgvaq baez hwnjdangz, lauxsae mwngz couh got dab sigenj ndeu byaij haeuj gyausiz daeuj, daj aen naj riunyumj mwngz couh guj ndaejdaengz dou baez neix gauj ndaej maqhuz ndei lo.“Gyoengq boux doengzhag, gyanghaet raeuz gaujsi gauj ndaej ndei raixcaix. Daih’it mingz, Denz Sinhyenz, daihngeih mingz, Se Denh……” Gou gingqyienz gauj ndaej daih’it mingz, lij ak gvaq “yozba” Se Denh dem, baez neix gou caen dwg caijsoq ndei lai lo! Gou caeg yawj Se Denh, naj de nyaeuqnyet lumj lwghaemz nei, gou gingqyienz miz di cojgvaq de.

Aeundaej mbaw sigenj le, gou gietdingh bae naj Couh Dabauj angjangj, song ngoenz gonq de lij mbouj fug gou ne. Gou byaij bae henz ndang de, daekeiq dwk cam:“Mwngz gauj ndaej baenzlawz ha?”De mbouj eiqseiq dwk goemq lanzdajfaen bae, mbouj hawj gou yawj faensoq de. Gou liuq yawj mbaw sigenj de, fwt raen dapanq diuz doeklaeng de dwg “6”, youq henz lauxsae lij daj le aen ngaeu ndingnding dem. Gijmaz? Dwg de loek, roxnaeuz dwg gou loek? Nanzdauh dwg gou loek, lauxsae baegaij seiz mbouj fatyienh? Sikhaek, gou caiq mbouj miz naj bae angj lo, gipmuengz gip mbaw sigenj hwnjdaeuj buet ma diegnaengh bonjfaenh. Gou dawzok ceijcaujgauj daeuj suenq gvaq, cuet lo, yawj loek aen soq ndeu, suenq loek lo, hoeng lauxsae mbouj fatyienh, mbouj gaij gvaqdaeuj! Ndaw sim gou sikhaek luenhyagyag liux, swhgeij gig mbouj yungzheih cij gauj ndaej daih’it, nanzndaej faensoq swhgeij sang gvaq “yozba” Se Denh, couh yienghneix mbouj miz la? Aeu cawj- doengh bae bauq lauxsae mbouj? Uk gou baenq bae baenq dauq, mbouj rox baenzlawz guh cij ndei, simndaet ndaej raeblaeng dumz hanh liux.

Mwhneix, banhcujyin Maj laux- sae daeuj lo, “Baezneix gaujsi gyoengq boux doengzhag ndaej 95 faen doxhwnj haenx, cingj hwnjdaiz daeuj lingx ciengj!” Caeuq mbouj caeuq lauxsae gangj? Gangj le, gig hoj cij ndaejdaengz aen daih’it neix couh mbouj miz lo, doxgaiq dajciengj hix mbouj miz lo; mbouj gangj couh baenz guhvunz mbouj lauxsaed lo. Doek- laeng gou lijdwg byaij hwnj gwnzdaiz bae, daj gyang fwngz Maj lauxsae ciep daeuj le doxgaiq dajciengj——diuz dangz mingzcoh heuhguh “vandiemz- diemz” ndeu, hoeng ndaw sim gou dwg haemzrangrang gangj mbouj ok.

Gienh saeh neix gvaqbae haujlai ngoenz lo, de lumj ndaek rin hunghung nei dimz youq sim gou, hawj gou diemheiq mbouj ndaej. Ngoenzneix, gou gietdingh lauxsaed coh lauxsae mwngz gangj okdaeuj, gouz mwngz yienzliengh gou, gou vanzdwg siengj guh boux vunz lauxsaed rox loek couh gaij.

Lauxsae, cingj mwngz yienz- liengh gou……

(Denz Sinhyenz raiz Ouh Caij- fangh hoiz)