Gienq raeuz coenz daihngeih,

Lwnh dauhleix daeuj caeuq,

Niemh bohmeh seng raeuz,

Yaek aeu bauq aencingz.

Gienq raeuz coenz daihsam,

Meh bak gamz mbouj cuengq,

Daengq raeuz gyoengq beixnuengx,

Muengh raeuz aeu roxsoq.

Gienq raeuz coenz daihseiq,

Raeuz aeu geiq daengz dai,

Bohmeh dwgrengz lai,

Raeuz wnggai hauqgingq.

Gienq raeuz coenz daihhaj,

Lwnh mbanj laj mbanj gwnz,

Miz meh cij miz mwngz,

Gaej lumz cingz lumz ngeih.

Gienq raeuz coenz daihroek,

Daj goek gangj roengzdaeuj,

Bohmeh seng miz raeuz,

De laux aeu hauqgingq.

Gienq raeuz coenz daihcaet,

Cawj byaek hawj raeuz gwn,

Ndaej ninz daengz gyanghwnz,

Nyi lwg daej hwnq caz.

Gienq raeuz coenz daihbet,

Ciengx raeuz get geijlai,

Bohmeh laux yaek dai,

Ganq de aeu naihsim.

Gienq raeuz coenz daihgouj,

Gou lwnh sou nuengxlinz,

Gwn raemx mbouj ndaej lumz,

Aencingz boux vat cingj.

Gienq raeuz coenz daihcib,

Bohmeh gip mak gai,

Ciuhvunz dwgrengz lai,

Raeuz wnggai gingq laux.

Gvaq giuz gaej lumz dwngx,

Gwn raemx gaej lumj mboq,

Niemh bohmeh sinhoj,

Aeu ciuqgoq ndaej ndei.

Bouxvunz daeuj gwnzbiengz,

Niemh aencingz bohmeh,

Ngoenz doek ngoenz bienq geq,

Hawj gyoengqde vuenyungz.

Roeg hung rox bwnq meh,

Yiengz gvih cij boiz aen,

Ciengx raeuz hung ndaej baenz,

Faenh cingz mbouj rox lumz.

Dag lwg mwngz lwg gou,

Dag simdaeuz doxbeij,

Daengz seiz ciengx lwg nyaeq,

Aen simsaeh goj doengz.

Yiemh ranz diemj doiq diemj,

Diemj caeuq diemj doiq caez,

Doiq bohmeh ndaej ndei,

Cog fukheiq gag daeuj.

Yiemh ranz diemj doiq diemj,

Diemjdiemj mbouj bien leiz(liz),

Daih bohmeh ndaej ndei,

Cog goj meiz(miz) lwg ciep.

Bouxlawz rox bauq aen,

Cog goj lwg caemh hauq,

Daih ciep daih rox bauq,

Daengz laux ndaej vuenyungz.

Daengngoenz doek baihsae,

Mbouj geij gyae roengz gumz,

Bohmeh ciengx baenz vunz,

Mbouj ndaej lumz aencingz.

（caengz sat）