Ngoenzhaenx singhgizhaj gyang- haet, dou daengx ranz vunz cungj bae ndaw youwzyenz lansai gou doeg, yawj gyoengq lwgnyez diuqfoux biujyienj angqhoh roek it. Geij bi mbouj ndaej yawj lwgnyez biujyienj lo, swhgeij hix roxnyinh sim’angq raixcaix.

Dou bae daengz ndaw youwzyenz, gyoengq lwgnyez caengz cangndang ndei, lij youq gwnz laeuz, dou ra daengq naengh ndei caj. Yaep ndeu, gyoengq lwgnyez baenz bang baenz bang roengzdaeuj lo. Ha ha, gyoengq lwgnyez iq daenj gij buhvaq gyaeundei lai lo, lij miz giz mbouj doxdoengz dem: Miz saekhoengz、saekheu、saek- henj、saek maeq、saekgim、saek- aeuj…… Yawj ndaej lwgda va caez, bouxboux daenj buhvaq cungj mbouj doxdoengz, hoeng cungj lengjlwtlwt. Bouxboux gwnz naj cungj miz song benq hoengzfefe, dahsau iq boux- boux gwnz gyaeuj cungj cug duj va- gyaj, gij saek va’gyaj caeuq gwnz ndang buhvaq doxdoengz.

Gij lwgnyez iq ndaej song sam bi, lauxsae youq baihnaj, gyoengqde boux gaem boux buh baihlaeng baizdoih byaij gvaqdaeuj, caen lumj gaeqmeh daiq gaeqlwg cet. Miz saek boux lwgnyez doq byaij doq aj bak daejnganga, caemhcaiq miz lwg iq ndeu lij aeu lauxsae umj, ndaej umj hix daej mbouj dingz. Gyoengq lwgnyez lai hung di, gak boux gag dawz aen daengq iq ndeu ra dieg naengh ndei, mbouj miz saek boux daej.

Biujyienj hainduj lo, dwg bang lwgnyez daenj buhvaq saekaeuj hwnj daiz, gyoengqde diuqfoux song vunz, ietfwngz gaem gen ndeigyaez dangq- maz. Gaenlaeng daengz bang daeglwg iq foux goengfou. Gyoengqde daenj gij buhvaq saekgim, bouxboux gaem diuz faexgyaengh iq ndeu, gyang hwet cug diuz sai hoengz, yienznaeuz fwngz oiq ga dinj, hoeng gyoengqde foux ndaej gig haeujsim.

Gou raen diuq ndaej ceiq ndeiyawj dwg bang dahsau iq diuq 《Yiengh Cunghgoz》. Gyoengqde gwnz ndang daenj buhhenj mbouj miz gen, laj ndang daenj vunjhenj, gwnz gyaeuj cug song duj va’gyaj saekhenj, bouxboux baihnaj gwnz daengq cuengq miz aen gyong henj ndeu. Riengz gij yinhyoz, gyoengqde yaep ndeu bekfwngz, yaep ndeu roq gyong, yaep ndeu diuq hwnjdaeuj, yaep ndeu cienq ndang…… Gwnz naj daekeiq fwngfwng, diuq ndaej gig saenzheiq gig mizyinx. Gou yied yawj yied sim- angq, maqmuengh swhgeij hix miz dahsau iq baenzneix ndwn youq gwnz daiz angqyangz diuqfoux.

Ceiq ndeiriu couhdwg bang lwgnyez iq daenj buhvaq saekheu, gyoengqde aiq ndaej song sam bi baedauq. Gyoengqde ngamq hwnj daiz bae ndwn, dou youq laj daiz couh nyaenx mbouj ndaej riu hwnjdaeuj lo. Bang lwgnyez ndawde, baiz ceiq baihnaj miz dah iq bizbwdbwd gwq daejngaungau. Caemhcaiq lij miz dah iq iqetet ndeu, gag de gwnz gyaeuj mbouj cug miz va’gyaj, aenvih de daeq aen gyaeuj ndoq, baenzneix cij ndaej youq gwnz aek cug duj va’gyaj he. Yawjraen gij yiengh songde dou cungj riu lo.

Hainduj diuqfoux lo, bouxboux cungj diuq hwnjdaeuj, cij raen dah iqetet haenx muenghmuengh bouxwnq hix gaen vadvad fwngz, aiq de mbouj geiq ndaej gij dungcoz lo. Dahsau iq bizbwdbwd haenx lij naengh gwnz- namh daej mbouj dingz, sing youh hung dem. Doeklaeng de gag daej mbwq le, gingqyienz ninz youq gwnz- namh laebdaeb daejfwtfwt! Seizneix miz boux lauxsae vaiqvet byaij hwnj daiz bae, umj de roengzdaeuj. Dou youq laj daiz cungj riuhaha hwnjdaeuj, gyoengq lwgnyez cingq diuqfoux, hix dingz roengzdaeuj muengh lauxsae umj de. Caiq yawjyawj dah iqetet haenx, de lumjbaenz gig simdingh, caenh diuq faenh de, gyoengq doengzdoih daej hix ndei dingz hix ndei, cungj mbouj ngaih daengz de. Raen gyoengq lwgnyez baenzneix caen dwg ndeiriu lai lo.

Ngoenzhaenx ndit haenq ndit manh, caengz yawj sat gyoengq lwgnyez biujyienj, gou hoz youh hat caemhcaiq dungx youh iek, raen miz di dwgrengz. Caen boiqfug bang lwgnyez neix baenzlawz dingj ndaej baenz nanz. Yawj lansai gou caeuq doengzdoih de diuqfoux sat, gou couh coux de daengz laj yiemh, bang de uet hanh gwnz naj, bwnq de gwn raemx. Riengzdwk soengq aen dangauh iq ndeu hawj de, hoh de roek it angqyangz. De doq gangj “gyo’mbaiq daxgux” doq hai okdaeuj, gwn ndaej vanswdswd. Gou sing unq cam de:“Ndei gwn lwi?” De hamz gaiq dan- gauh iq he riu naeuz:“Ndei gwn lai lo!” Raen de gwn ndaej baenzneix hom riunyumj ndaej baenzneix maez, gou roxnyinh deng dak ndit baenzlai nanz hix dij lo.

Ngoenzneix gou hix suenq ndaej gvaq roek it lo, sim’angq dangqmaz.