Gij gyaez daxboh naekhung lumj goengqbya ne, baujhoh gij feiz sengmingh hoengh youq; gij gyaez daxboh lumj feiz, diemj dawz aen daeng maqmuengh; gij gyaez daxboh lumj daeng, ciuq rongh gij loh byaij baihnaj; gij gyaez daxboh lumj roen, vixyinx ciuhvunz gou.

Geiqndaej miz ngoenz ndeu gyanghwnz, gou cingq guh loqfangzhwnz, sawqmwh gamj- daengz conghndaeng miz maz daxgaiq saek coq, supheiq dwgrengz lai, gou guhmuengz benz roengz congz daeuj, buet hwnj gwnz laeuz bae ngauz singj daxboh. Gou naeuz:“Daxboh, ndaeng……gou ndaeng saek……ndaeng……ndaeng saek……dwgrengz lai!”Daxboh baez dingq le singheuh gou, sikhaek ra ok dijvunhgi daeuj hawj gou rau dijvunh, gvaq haj faencung le, daxboh dawz dijvunhgi daeuj baez yawj, 40.5 doh. Daxboh yawj le, rox gou dwg dwgliengz fatndat lo, couh buet daengz daihngeih caengz laeuz bae, daj ndaw binghsiengh dawz gaiqdoiqndat siujsim dwk nem daengz gwnz najbak gou, yienzhaeuh dawz aen swiz ing coq gyaeuj congz, hawj gou ing youq, ciepdwk youh buet roengz laj laeuz, cung boi yw ndeu hawj gou, gou ngamq gwn gaemz ndeu, haemz- hamham ne, couh doiq daxboh naeuz:“Daxboh, gij yw haemz lai lo, gou mbouj gwn!”Daxboh riu dwk naeuz:“Lwghuk,ywhaemz ywbingh ndei, dawz de ndoet roengzbae, bingh mwngz couh ndei lai vaiq lo.”Dingq le gij vah daxboh, gou couh dawz boi yw neix, gaemz ndeu ndoet roengzbae.“Eiya, gou aeu oknyouh! Ngamq yietnaiq geij faen cung, gou youh heuh singhung hwnjdaeuj. Daxboh lienzmuengz buet daengz bakdou veiswnghgenh hai daeng hawj gou. Daj veiswnghgenh ma daengz gwnz congz, gou youh ngunhngwg ninz ndaek lo. Ngoenz daihngeih haetromh ndiu le, yawjraen daxboh lij naengh youq henz ndang gou, gwnz naj sienhsoh de youh lai miz geij diuz riznyaeuq lo. Siengj daengz haemhlwenz daxboh vih gou nyaengq bae nyaengq dauq, couh lumj miz raq rumzraeuj ndeu ci haeuj ndawsim gou.

Gij gyaez daxboh naekhung lumj goengq- bya ne, de itcig baujhoh gou majhung, couh lumj gofaexhung ndeu, vih gou dangj rumz dangj fwn, gou ciengxlwenx gyaez daxboh gou.

（lauxsae son’gyauq: Cinz Dunghmeiz/覃冬梅）