Gou gyaez diuqfoux, gyaez gij dungcoz diuqfoux ndeiyawj. Gou doenghbaez miz saeh simnyap, lij naemj ndek bae, danhseih vunz ranz gou mbat youh mbat haengjheiq hawj gou, hawj gou genhciz roengzdaeuj.

Seizhaenx, gou ngamq doeg ngeih nienzgaep, aenvih gou iq seiz couh gig gyaez diuqfoux, ndang ndok gou unq dangqmaz. Daxmeh hawj gou bauqmingz haeuj aen ban diuqfoux, gou angqyangz ndaej aj bak hemq- langlang hwnjdaeuj, got daxmeh hemq:“Daxmeh ndei, daxmeh lengj……” Couh yienghneix, sim gou baedauq cungj muengh ndaej diuqfoux.

Daxmeh bang gou bauqmingz le, gou angqfaengfaeng dwk byaij bae ranz diuqfoux. Ngoenz daih’it, gou gaenj- cieng dangqmaz, cengqgengz nyoengx hai bakdou, lauxsae ndatcingz ciep- daih gou, heuh gou baizdoih, diemj vunzsoq, heuh dou bae vuenh buhvaq diuqfoux. Buhvaq diuqfoux dwg geu vunj hoengzmaeq ndeu, lij miz geu vaqmad hau ne. Caj daihgya cungj vuenh ndei buhvaq diuqfoux, lauxsae sien son dou guh gihbwnj dungcoz, byawz rox lauxsae hawj dou lienh guh vengzca、atdin, gou laihnaeuz cibfaen genjdanh, naemj mbouj daengz baenz- neix hoj. Gou ajga, cix ca haujlai cij ndaej daengz laj. Gou muengh- muengh bouxwnq, roxnyinh gyoengqde cungj beij gou iq, danhseih gyoengqde cungj beij gou guh ndaej ndei, beij gou ak. Yawjraen gyoengqde iq gvaq gou hix cungj vengzca ndei, gou ne, hung gvaq gyoengqde danhseih ca mbouj ndaej, saenqsim gou sikhaek sied lo. Gou mbouj mingzbeg dwk cam lauxsae: “Lauxsae, vih gijmaz aen dungcoz neix gou guh mbouj baenz ne?” Lauxsae rubrub gyaeuj gou gangj:“Ndang ndok mwngz geng lai, ndigah mwngz mbouj vengzca ndaej, mwngz aeu lai di lienhgoeng cijndaej ha!”Dingq le gij vah lauxsae, gou saetmuengh lai lo. Daxmeh rox lo, daengq gou naeuz:“Lwg ha, gaej you, gaej you, mwngz lienh lai di cungj ndaej lo.”Couh yienghneix, daxmeh gujli gou, gou youh mizsim mizrengz lo, youh miz saenqsim bae lienh dungcoz diuqfoux lo.

Daj neix hwnj, gou youq ranz menhmenh lienh hag gihbwnj dung- coz—vengzca、ajga、roengzhwet、atdin daengj gihbwnj dungcoz. Seizneix, gou cinbu gig vaiq. Mbat liux mbat dem, goengfou mbouj vei boux miz sim, gou dauqdaej lienh baenz geij aen dungcoz hoj neix lo.

Haenqrengz lienhhag diuqfoux, neix hawj gou lai mizrengz lai miz saenqsim bae doegsaw. Seizneix gou engqgya ndiepgyaez diuqfoux lo. Aenvih diuqfoux hawj gou miz yinxdaeuz, hix caenh deuz doenghgij simnyap ndaw sim gou.

（lauxsae son’gyauq: Luz Haij- ginz/陆海琴）