Ngoenzneix banringz, gou caeuq daxbuz hag cauj haeux gyaux gyaeq.

Gou sien dawz geij aen gyaeqgaeq caeuq aen vanj hoengq ndeu daeuj, caepcawq “dub gyaeq”. Gou aeu gyaeqgaeq lejlej roq roengz bak vanj bae, byukgyaeq ngamq mboep didi, caiq yunghrengz roq baez ndeu, byukgyaeq couh buq lo. Gou siujsim yupyup mbekhai byukgyaeq, “bu” singq ndeu, gyaeqhau caeuq gyaeqhenj doengzcaez doek roengzbae, cwxcaih ninz youq gyang vanj lo.

Ciep roengzdaeuj couh aeu “hoed gyaeq” lo! Gou fwngzswix gaem vanj, fwngzgvaz gaem dawh, aeu dawh mboujdingz bae gyaux gyaeq, fatok gij singyaem hoed gyaeq “daddaddad” daeuj. Mbouj geij nanz, gyaeqhau caeuq gyaeqhenj couh doxyungz caezcaemh lo.

Seizneix, hainduj cauj gyaeq. Daxbuz hai feiz, ndingq lauz roengz ndaw rek bae. Gvaq le geij miux, daxbuz son gou dawz gij gienghgyaeq hoed ndei haenx ndingq roengz rek bae, cij dingqnyi “sa” singq ndeu, gienghgyaeq sikhaek sanq baenz aen “bingjluenz” henjgim ndeu, seiqhenz de lij “cwcwcw” bongz baenz aen bop iq dem. Miz geij diemj raemx gienghgyaeq sinz hwnj- daeuj, youq gyang rek mbouj dingz yatyet hwnjroengz. Gvaq yaep he, couh miz heiqrang coemjnaj lo. Daxbuz heuh gou canj suenz aen bingjgyaeq, yienzhaeuh cang roengz vanj bae.

Mwhneix, daxbuz youh dauqcungz hai feiz coq rek, roengz lauz, caiq ndingq gij haeux bwh ndei haenx roengzbae, hainduj cauj haeux. Gij naedhaeux nem lauz le, bienq ndaej ronghrikrik liux, gvaiq mbouj ndaej gyoengqvunz aeu naeuz “haeuxcaw” ne! Yienzhaeuh gou gya roengz gij gyaeq cauj ndei haenx, fan cauj ndaej yinz bae. Va, couh lumj naedcaw vanq hwnj gimsoiq nei, ndeiyawj lailai. Doeklaeng roengz sieg gyu caeuq di coengsoiq he, cauj yinz, daek hwnj cang buenz. Buenz haeux gyaux gyaeq homfwt youh ndeiyawj ndeigwn ndeu couh guhbaenz lo.

（Couh Yiyinh raiz Ouh Caijfangh hoiz）