Ngoenz singhgiz, nditrongh raeujrub, gou sij cozyez sat le, daeuj daengz conghcueng yawjyawj duzgungq iq gou ciengx youq ndaw buenzraemx haenx.

Gou lejlej youq henz buenzraemx roqroq song mbat. Yi, duzgungq iq baenzlawz mbouj lumj bingzciengz ityiengh “fwt” diuq hwnj- daeuj, youq ndaw buenzraemx youz bae youz dauq, seizneix de baenzlawz mbouj ning saekdi ne? Gou youh yungh ga dawh bae dod de, de lij dwg caemrwgrwg, gou gamjdaengz gig geizgvaiq, couh loeg de hwnjdaeuj, aen ndang de unqnemnem. Gou sijsaeq baez yawj, dwg naeng gungq, mbwn ha, nanzdauh duzgungq dai bae la? De deng gijmaz doenghduz gwn ndaw bae la?

Gou siengsim dwk dawz de cuengq haeuj ndaw buenzraemx bae, raemx baez doengh, go’nywj raemx baihlaj couh diuq ok doenghduz ndeu. Dwg gijmaz ne? Gou byaengq hung lwgda, menhmenh biengj hai go’nywj raemx, yi, baenzlawz youh miz duzgungq iq ndeu ne? Hung iq caeuq duz gaxgonq ca mbouj geijlai, de hix mbouj ning saekdi boemz youq henz go’nywj raemx.

Gou siengj hwnj swhgeij youq gwnz bonjsaw ndaej daengz cihsiz: Duzngwz、duzgungq daengj doenghduz haenx, moix bi cungj aeu bok naeng baez ndeu. Seizneix, gou mingzbeg lo, gyamq haxbaenh gou yawjraen dwg duzgungq bok, caencingq duzgungq dwg ndoj youq gizneix ne!

Doenggvaq gienh saeh neix, gou rox ndaej daengz, aeu lai doeg saw, cijaeu hawj aen ukgyaeuj swhgeij rim hwnjdaeuj, cijndaej gejhai aen nanzdaez youq ndaw swnghhoz.

（lauxsae son’gyauq: Cinz Cinhdonz/覃珍团）