Faex dem ngeiq cij mwn,

Haeux cwnh baengh cin gauq,

Lwnh hawj gyoengq simjsauj,

Bohmeh laux aeu gyaez.

Ciengx lwg ndaej majhung,

Cungj dwgrengz haujlai,

Mbouj rox seizlawz dai,

Raeuz wnggai ciuqgoq.

Mbouj guh gvaq mbouj rox,

Bohmeh hoj geijlai,

Songde laux yaek dai,

Raeuz aeu lai dajleix.

Hwnj ndoi bae aeu haz,

Raemxda doq couh sinz,

Bohmeh caensim in,

Aeu nyinh cingz gyoengqde.

Cog sou miz lwg iq,

Goj hix baenzneix gyaez,

Bohmeh doxdoengz caez,

Bouxboux niemh saeh lwg.

Sim bohmeh lajmbwn,

Cungj vunzvunz baenzneix,

Gyaez lwg gyaez haeuj saej,

Ciengeiz yiemz bohmeh.

Donq gwn meh youh umj,

Mbouj sij ndinj roengz hoz,

Iek youh bwnq gaemz noh,

Meh rox gyoh geijlai.

Ciengx raeuz caen sinhoj,

Gyaez cungj mbouj rox liux,

Daengz rox gangj rox iu,

Meh cij riunyumnyum.

Miz lwg lumj gwn rwi,

Ngoenz bang swiq din naj,

Hung daengz cibseiq haj,

Lwgda caengz yawj gaeuq.

Vih raeuz ndaej baenzvunz,

Boh guhhong ma ciengx,

Vih raeuz ndaej baenzyiengh,

Hoj gwnzbiengz gwn caez.

Okrog bae ra ngaenz,

Gij hong lai baenz boi,

Dwgrengz mbouj ienqhoij,

Vih lwg oiq gvaq ndei.

Daj lij iq daengz hung,

Cungj aeu feiq simgei,

Vih lwg iq ndaej ndei,

Guh saeh maz doq nyienh.

Bae guh hongreihnaz,

Aemq baihnaj baihlaeng,

Mboujguenj baenzlawz nyaengq,

Mbouj sij hawj naengh namh.

Bae henz dah rap raemx,

Meh hix aemq gwnz ndang,

Youq henz sim cij an,

Coq lwg youq gyang fwngz.

Meh bae haw bae mbanj,

Cungj gip ganj dauqma,

Miz naed noh gaiq bya,

Suek ndei ma bwnq lwg.

Ngoenz bae naz bae reih,

Meh hix geiq hozsaej,

Yietnaiq ndaej cuengq cae,

Buet bae umj lwg gonq.

Ciengx daengz roek caet bi,

Lwq iq bae hagdangz,

Daengq aeu gvai dingqgangj,

Gaenx hag dungx cang maeg.

Ciengx daengz cibseiq haj,

Caengz rox gag ra gwn,

Maj ndaej baenzneix hung,

Bohmeh cungj mbouj vei.

Iq you mbouj doq hung,

Baez baenzvunz youh you,

Aeu bawx guh ranz youq,

Sim bohmeh mbouj daengx.

It aeu you gyaqlaex,

Ngeih baij daiz daih hek,

Ngoenz you bwt yaek dek,

Caensim get ndawhoz.

Ok saekdi makraemx,

Meh baenzhaemh mbouj ninz,

Baez daej raemxda sinz,

Canghyw cim cij nai.

Daj iq ciengx daengz hung,

Mbouj ndaej soeng saek raq,

Guh ranz aeu bawx yaq,

Caj ngoenzndei faen cauq.

（caengz sat）