Seizcin, lajmbanj gyaeundei maez vunz. Faex gwnz bya longz geu buh heuloeg, ndaw ndoengfaex hai rim va’ndoi baenz congz baenz caz, duzroeg baenz bang baenz doih youq ndaw ndoeng mbin bae mbin dauq, duzmbaj raiz youq naj ranz laeng ranz gvaengzgvax, seiz mbin seiz douh, cungj gingjsiengq hoenghfwdfwd caen hawj vunz da yawj mbouj bienh.

Hoeng, ceiq hawj gou nanzlumj dwg doengh duzgvej ndaw naz caeuq doengh duz biengzbeih henz rij.

Lajmbanj doek ciengz fwn hung le, rim naz rim doengh gyonj dwg duzgvej. Moix ngoenz banhaet, gou caeuq geij boux doengzdoih iq cungj gyaez daengz gyang doengh naz najmbanj, boemz youq gwnz gaiq rin ndeu, dingq sing duzgvej hemq. Gyoengq duzgvej mbouj rox miz geijlai duz, sam haj duz guhdoih maeuq youq gwnz gaiqgik, naj coh vunz, daengx lwgda, moj aen gemj dwk, vaiqvued hemq dwk. Cungj sing hemq couh lumj fanh vunz caez ciengq nei, seiz hwnj seiz roengz, seiz sang seiz daemq, seiz ciengq seiz dingz, gig miz cezcou. Gizgyawj, cijaeu miz duzgvej ndeu hainduj hemq, gizyawz couh riengz hemq hwnjdaeuj, gij singyaem haenx couh lumj raemxlangh nei coh seiqhenz cienz bae, youh daj seiqhenz cienz dauqma, ndeidingq lai lo. Cijaeu miz duz ndeu dingz roengzdaeuj, gizyawz hix riengz dwk dingz roengz- daeuj, doenghnaz youh bienq ndaej caemrikrik.

Couh youq seiz caemrikrik neix, gyoengqde duz gaen duz diuq roengz ndaw raemx sawdikdik bae, iet song diuz ga raezrang, doxgyoeb guhcaemz. Guhcaemz yaep he, gyoengqde youh diuq hwnjdaeuj, hainduj caez ciengq hwnjdaeuj. Seiz duzgvej hemq, song henz hangz gyoengqde couh bongq hwnj song benq aihau, lumj dujfaiq nei hausaksak. Daengz daengngoenz hwnj daengz gwnz dingjgyaeuj, gyoengq duzgvej cij caem roengzdaeuj, ndonj haeuj ndaw geh namh bae lo.

Duzgvej ndoj hwnjdaeuj, biengz- beih cix mbin okdaeuj lo. Aenvih banhaet gij fwed biengzbeih nem raemxraiz mbin mbouj ndaej, caj daengz daengngoenz dak hawq raemx- raiz gwnz fwed le, cij mbin okdaeuj. Biengzbeih ceiq maij douh youq gwnz ganjnywj henz rij roxnaeuz gwnz mbawngaeux ndaw daemz. Lwgda hunghang ronghringx, diuz fwed bingzsoh ronghcingx, diuz rieng raez- rang. Lwgda biengzbeih gig maenh- ak, mboujguenj mwngz daj gyawz depgaenh de, mwngz baez doengh, de couh raen lo, baez yat couh mbin deuz lo, riengjret beij yaep lwgda lij vaiq.

Ndigah, gaeb biengzbeih aeu miz naihsim, aeu mbaet heiq, ndwn youq henz ganjnywj de maij douh, dawz fwnz iet gaenh, lumj vunzfiengz neix mbouj doengh saekdi. Biengzbeih doekdingh ndwn youq henz, de nyinhnaeuz mbouj miz yungyiemj le, cij mbin gvaqdaeuj douh youq gwnz dingj ganjnywj. Seizneix lwgfwngz couh menh yaengx coh laeng rieng de bae, depgaenh le, song cik lwgfwngz baez nyip, biengzbeih couh deng gaeb lo.

Gij fuengfap ceiq mizyinx gaeb biengzbeih, dwg ndonj youq ndaw caznywj, dawz fajfwngz iet okdaeuj mbouj doengh, biengzbeih laihnaeuz dwg faexgyaengh daengj youq ndaw caznywj, couh douh youq gwnz fajfwngz, seizneix aeu fwngzmeh caeuq fwngzyinx riengjret nyoeb diuz rieng de, couh gaeb ndaej lo. Gij fuengfap ceiq bwnh dwg aeu nge faexcuk van baenz aen luenz ndeu, youq gwnz nem rongzgyau, coh biengzbeih baet bae, biengzbeih baez bungq rongzgyau gwnz hongx couh deng nem lo.

Gaeb ndaej biengzbeih le, dou couh youq laeng rieng de lamh diuz mae nding ndeu, cuengq de mbin, diuz rieng de rag dwk diuz mae nding mbin youq gwnzmbwn, lumj cuengq yiuhrumz nei. De mbin daengz gyawz, dou couh gyaep dawz gyawz. Raen de baeg lo, mbin mbouj ndaej lo, dou cij gej diuz mae, cuengq de deuz.

Moix ngoenz, dou couhdwg yienghneix dingq sing duzgvej, daengz henz rij gaeb biengzbeih, dou angq ndaej lumj gwn bae. Mboujguenj vunzlaux baenzlawz coi baema gwn haeux, dou hix mbouj nyienh dauq.