Ndwen 5 ngoenz 10, Nanzdanh Yen Luzcai Cin Bahding Segih Mbanjdaulij banh aen yizsi guh hongreih hongnaz bi 2019, vunzguhnaz Bouxcuengh dangdieg, mizmbangj cae naz cae reih, mizmbangj rap bwnh vanq bwnh, mizmbangj loek gyaj ndaem gyaj, daj gyae yawj bae, gyangdoengh nyaengqnyatnyat, lumj fuk veh gij gingj doenghnaz nei.

Ciuq cam rox, Mbanjdaulij neix miz 190 ranz vunz, gyaeujvunz 1000 lai vunz, reihnaz 1222 moux, bi ndaem ok haeuxgwn 140 fanh gaen, aen mbanj neix dieg youq baihnamz Yinzgvei Gauhyenz, haijbaz 800 lai mij, bi bingzyaenz raeuj 16.5℃ baedauq. Aenvih diegndei swyenz neix, haeuxgok aen mbanj neix ndaem okdaeuj haenx, naed raez naed fag, saekhau caemhcaiq lwenq. Cawj baenz le haeux hom、haeux unq mbouj niu、ndei gwn、gyoet le mbouj ndongj, hawj vunz gyaez cawx.

(Fuz Lungzgyangz Bwz Cicwz/符龙强 柏治泽)