Aen densi lanzmoeg loih vwnzva cauhnduj 《Minzcuz Vwnzva》 youz aen donzdui Gvangjsih Veisi gag yenzfat guh haenx ndwen 5 ngoenz 5 hainduj cingqsik boqcuengq. Aen cezmuz dingh moix ngoenzsinghgiz 21∶40 youq Gvangjsih Veisi boq baez nduj. Aen cezmuz neix muzdiz dwg angjcuengq dujva minzcuz、fwen minzcuz、langhbaij gij gyaeu minzcuz、cauh hoenz minzcuz, doenggvaq gij soujduenh densiva、gojgaeqvaq, engq cienzmienh、engq haeujlaeg、engq mizyinx langhbaij、cienzboq、cienzdoh、fatyiengz gij vwnzva maenhndei Cunghvaz Minzcuz、senhconz gij vwnzva cienzdoengj bonjdieg Gvangjsih、doxgyau hag’aeu gij vwnzva maenhndei seiqgyaiq.

《Minzcuz Vwnzva》 dingjmaenh gij cauhguh yinxyiengq yungh lwgminz guh gyangsim, cawjgiek daj gihcwngz daeuj, dwg bouxvunz roxnaeuz gyoengq vunz gyaepgouz loqsiengj fatyiengz swnjcienz minzcuz vwnzva haenx. Gyoengqde yungh gij cingz saedsoh, guhbaenz gij yaem’wenq hawj vunz gamjdoengh, yungh gij yiengh yisuz lwnhgangj lwgminz gak cuz ndiepgyaez ndwenngoenz、ndiepgyaez mbanjranz、gagsaenq vwnzva、saenq seizdaih.

《Minzcuz Vwnzva》yaek geiqboq 12 geiz, moix geiz cezmuz 30 faen cung youq ngoenzsinghgiz banhaemh Gvangjsih Veisi boqok, cib ciz doekgonq yungh gij soujfap geiqsaed lwnhgangj gij gojgaeq bouxvunz guhdaeuz haenx, song ciz doeklaeng senj gij cezmuz ndei ndawde bae funghranz yienjboq comzyienj vwnzyi. Geiq daih’it geiz nduj boq Aen Duenz Habciengq Vunzvet, aen duenz habciengq “gwnz muengx okmingz” bonjdieg Gvangjsih neix. Aen duenz habciengq yisuz hamj gyaiq neix youz bouxgyaez ciengqgo gak hangz gak gyaiq gapbaenz， aenvih cauhmoq yienjciengq 《Gingjcangj Meuz- ndaem》， ndaej 《Yinzminz Yizbau》 diemj mingz haenh, sibinz gwnz muengx cungjsoq yawjngonz cung- byoengq 2000 fanh, aenvih neix ndaej okmingz. Ndaw cezmuz, cujdaujyenj gvancez gij leixniemh meizdij doxgap, cingj boux cawjboq cezmuz ciengqgo dendaiz dangguh bouxrabauj minzcuz vwnzva, damqcunz Aen Duenz Hab- ciengq Vunzvet, doenggvaq dendaiz cazyawj, giethab gij soujduenh biuj- dap densiva gojgaeqsingq, caeuq donzyenz itheij baizlienh, hag gij cingz minzcuz biujdap vwnzva bonjdieg、haenh gij siengjmuengh ndaw ndwen- ngoenz nyaengqnyat, haenqrengz yungh habciengq yienj gij gojgaeq minzcuz vwnzva seizdaih moq caeuq ndwen- ngoenz gyaeundei.

Ciuq cam rox, 《Minzcuz Vwnzva》 lij yaek doenggvaq aen bingzdaiz yungzmeizdij, yungh gij hingzsik bouxcoz maij dingq gyaez yawj haenx, youq veihboz、veihsin、diuzdaeuz ngoenzneix daengj gwnz muengx fat, doengzseiz hix doenggvaq aen bingzdaiz meizdij moq gvangqlangh ra bouxswnjcienz caeuq bouxgyaez minzcuz vwnzva, senj bouxvunz ceiq ndei de caeuqfaenh loegguh cezmuz.

(Bangz Gwzbingz)