Bi 2018, Guekgya Minzveij、Gyauyuzbu dingh Hozciz Si Dunghlanz Yen Vujcon Cin baenz aen dieg guh- yiengh aenmbanj(segih) song vah huz- ndei buek daihngeih daengx guek 9 aen ndawde aen ndeu. Bi lai doxdaeuj, Dunghlanz Yen gig yawjnaek, caen ca caen guh, doenggvaq son’gyauq、doeksaed cwngcwz、hozdung lai yiengh daengj banhfap, roengzrengz doicaenh hong cauhlaeb “dieg guhyiengh song vah huzndei daengx guek”, aeundaej cingzcik yienhda.

It dwg banh son’gyauq, daezsang roxyiuj、daezswng naengzlig. Bi lai doxdaeuj, gonqlaeng banh aen ban son- gyauq ganbu cizgungh hag Sawcuengh、aen ban son’gyauq vunzlai eu fwen, gungh miz 200 lai boux ganbu ginzcung caeuqfaenh hag. Doengzseiz, giethab hong cinjcing banggungz seizneix, Dunghlanz Yen lij haenqrengz haiguh hong banggungz vahgangj, banh le “aen ban yungh Cuengh Gun song vah son’gyauq gohgi”“aen ban yungh song vah son’gyauq dinfwngz ‘muengx- doxlienz+dajciengx gaeqnohndaem’” daengj aen ban son’gyauq dinfwngz ndeiyungh, yungh Vahcuengh bonjdieg sonhag, ginzcung dingq ndaej rox、hag ndaej vaiq、geiq ndaej maenh, bang- rengz ginzcung vut gungz, doidoengh ginghci hwngfat.

Ngeih dwg doeksaed cwngcwz, cauh’ok heiqfaenh、 coicaenh nyinh- doengz. Doicaenh doeksaed gij cwngcwz sawvah minzcuz, baiz gak danhvei Dunghlanz Yen Vujcon Cin、baiz- geiqhauh cwngvu daihding daengj, baizdazyinx roenloh、 baizmingzdeih 13 aen mbanj henzgyawj Vujcon Cin、dieggingj lijyouz Laeuzgveizsingh daengj cungj yungh Cuengh Gun song cungj saw. Linghvaih, dajcauh “diuzgai Cuengh Gun song vah”, guh 22 gaiq baizgeiqhauh hung hongrog miz Cuengh Gun song cungj saw, gujli caeuq haeujcoengh bouqdiemq henz gai ciubaiz yungh Cuengh Gun song cungj saw.

Sam dwg hozdung lai, daezswng yaugoj、gyalai yingjyangj. Gonqlaeng banh le aen hoih yienjciengq go Vahcuengh coux ciengmoq bi 2018、aen vanjvei yienjheiq coux ndwencieng song vah huzndei daengj, mboujduenh gyalai yingjyangj；doicaenh sonhag Cuengh Gun song vah caeuq son’gyauq vwnzva minzcuz dox giethab, youq Vujcon Cin Gyanghbingz Siujyoz caeuq Vujcon Cin Cungsim Siujyoz hai dangzgoq Sawcuengh Vahcuengh, ndaej daengz hagseng、lauxsae caeuq bohranz haengjgyaez; fanhoiz loegguh denyingj 《Ak Lo, Aen Guek Raeuz》 banj Vahcuengh Dunghlanz, soengqlaex laebdangj 97 hopbi, ndaej daengz bouxyawj haenh.

(Lanz Gwngjdwngh)