Mboengqneix, Vujmingz Gih Gyauyuzgiz fat dunghcih dingh Vuj- mingz Gauhcungh、Sanghgyauz Cungsim Hagdangz、Senhhuz Cin Cungsim Hagdangz、Sanghgyauz Cin Sanghgyauz Siujyoz、Sanghgyauz Cin Yihlingj Siujyoz daengj 5 aen hagdangz guh hagdangz Cuengh Gun song saw vah. Daengz neix, Vujmingz Gih hagdangz Cuengh Gun song saw vah gyalai daengz 13 aen, ndawde siujyoz 8 aen、cuhcungh 4 aen, gauhcungh aen ndeu.

Vujmingz Gih liglaiz yawjnaek baujhoh vwnzva vahgangj Boux- cuengh, doenggvaq son’gyauq song saw vah doidoengh swnjcienz caeuq hwngfat vwnzva minzcuz. Bi 2018 ndwen 8, 《Aen Diuzlaeh Hong Saw Vah Minzcuz Vunznoix Gvangjsih Bouxcuengh Swcigih》 cingqsik hengzguh, gyavaiq yamqdin fapceihvaq hong saw vah Boux- cuengh. Seizneix, Sawcuengh Vah- cuengh youq Vujmingz Gih hwngfat haemq ndei、nyinhdoengz caeuq yungh gvangqlangh, byaij hwnj diuzroen Cuengh Gun song saw vah huzndei hwngfat. Cigoenggyau、hag- dangz、baiz hingzcwng gihgou daengj, diegdieg raen miz Sawcuengh. Linghvaih, Vujmingz Gih Gvangjbo Densidaiz lij hai le aen cezmuz Vahcuengh, ndaej daengz vunzlai haenh.

Vujmingz Gih ciuq dajcauh gij binjbaiz minzcuz gyauyuz, haenqrengz saedhengz aen gunghcwngz hidungj vwnzva minzcuz haeuj hagdangz, okyienh buek binjbaiz minzcuz gyauyuz ndeu, bienyaenq 《Vujmingz Mizyinx》《Sawcomz Vwnzva Yizcanj Vujmingz》 daengj buek sawsonhag vwnzva minzcuz deihfueng ndeu; aeu eu fwen、diuq fouxsaux daengj vwnzva minzcuz yungzhaeuj sonhag bae; Aen Duenz Yienjheiq “Lwggingloz” Gingloz Siujyoz Daibingz Cin youq bi 2012 daengx gih siujyoz Cuengh Gun song saw vah biujyienj dungxcaiz doxdax ndaej mingz daih’it aen cuj ciengqgo. Bi 2016 byai, Minzcuz Cunghyoz Vujmingz Gih、Gingloz Siujyoz Daibingz Cin ndaej aen cwngheuh “hagdangz guhyiengh son’gyauq vwnzva minzcuz swcigih buek nduj”. Bi 2018, Gingloz Siujyoz Daibingz Cin ndaej hwnj mbaw buengj gingniemh okhingz hong dwz- yuz daengx guek cungh siujyoz bi 2018.

(Lij Yungjvaz)