Seizneix, youq dangj dazyinx baihlaj, gyoengq- vunz raeuz gij ndwenngoenz cungj gvaq ndaej gig ndei lo. Ndigah, gyoengqvunz gwnz mbanj hix cungj hwng hawj bouxgeq banh laeuj hoh souh, hawj bouxgeq angqyangz caemhcaiq yienh’ok lwglan hauqswnh. Mbanjnazmungz ranz singq Cinz miz boux goenglaux ndeu, de miz 3 boux lwggwiz. Gyoengq lwggwiz de cungj miz di loengcawq: Lwggwizdaih gyaeuj baenz laih, lwggwizngeih raemxda nyamq, lwggwizsam mug gwq lae.

Miz ngoenz ndeu, goenglaux ndaej 80 bi banh laeuj goenghoh. Gyoengq caencik baengzyoux cungj daeuj hawj de dem fuk dem souh. Yaek gwn ngaiz seiz, goenglaux doiq 3 boux lwggwiz naeuz:“Ngoenzneix dwg ngoenzndei, daengz seiz gwn ngaiz gwnz daiz, sou mbouj ndaej gaeu gyaeuj、uet raemxda roxnaeuz uet mug. Danghnaeuz sou guh le, couhdwg mbouj gitleih, hix dwg mbouj gingq bouxhek, sou geiq maenh bw!” 3 boux lwggwiz cungj ngaekgyaeuj han naeuz:“W! W! Rox lo! Rox lo!”

Gwn ngaiz daengz byongh lo, 3 boux lwggwiz cungj nyaenx mbouj ndaej lo, nanzsouh yaek dai: Lwggwizsam mug lae daengz bak youh dauq sup hwnjbae, lwggwizngeih daengx naj cungj dwg raemxda, lwggwizdaih humz ndaej bi gyaeuj nyegnyeg. Vahsug gangj “Sae miz sae giuj, dauh miz dauh gvai”. Sawqmwh, lwggwizdaih mwh gip bienq gvai, de doiq lwggwizngeih caeuq lwggwizsam yaepyaep lwgda, couh ndwn hwnjdaeuj, doiq ok daiz song yamq, doiq gyoengqvunz naeuz:“Gou gangj gienh saeh he hawj caezgya dingq, haxbaenh gou daeuj daengz byongh roen seiz, raen miz song duz yiengz doxhoenx.”

Goenglaux doq geizheih cam:“Baenzlawz doxhoenx?” Lwggwizdaih sikhaek dawz song fwngz cuengq youq gwnz gyaeuj bae, hag gij dungcoz duzyiengz doxhoenx, doq gaeu gyaeuj doq naeuz:“Baenznyaenx! Baenznyaenx!”

Song boux lwggwiz wnq raen lwggwizdaih yienghneix guh le, hix sikhaek ndwn hwnjdaeuj, doiq ok daiz song yamq. Lwggwizngeih dawz song genbuh hwnjdaeuj, baihgvaz vadvad gvaq baihnaj lwgda bonjfaenh, baihswix hix vadvad gvaq baihnaj lwgda bonjfaenh, doq uet raemxda doq gangj:“Gou cungj mbouj saenq! Gou cungj mbouj saenq!”

Lwggwizsam hix riengz dawz genbuh vad gvaq baihnaj conghndaeng bonjfaenh, doq saengq mug okdaeuj doq gangj:“Gou aeu saux bae gyongz song duz de! Gvaq yaep he couh dawz ma hawj caezgya soengq laeuj!”

3 boux lwggwiz couh yienghneix lumj haidaiz ciengq heiq nei, nauh ndaej caezgya riuhaha, caemhcaiq hix ndaej gaij gij nanzsouh bonjfaenh lo.