Meh Daeg’anh dwg boux meh- mbwk lajmbanj he, bineix ndaej 92 bi lo. De miz 7 daeg lwg, seizneix lwglan baenz gyoengq, laenj gaenq miz cibgeij boux lo. Aen ranz hung ciemq baenz buenq mbiengj mbanj bae.

Daeg’anh dwg daeglwghaj de, youq ndaw singz gunghcoz. Meh de gaen de bae ndaw singz gvaq ndwen- ngoenz ndaej cibgeij bi, doeklaeng mbouj rox dwg mbwq gij ndwenngoenz ndaw singz, roxnaeuz dwg ndiep lwglan lajmbanj, song bi gonq gienj baufug dauqma lajmbanj lo. Cam de vihmaz mbouj nyienh laebdaeb youq ndaw singz yiengjfuk, de cij han naeuz:“Ndaw singz laeuz sang, gik bin.”

Meh Daeg’anh caen miz fuk, baenzngoenz riu mbouj dingz. De ceiq gyaez guh song gienh saeh, gienh ndeu dwg fat hungzbauh, lingh gienh saeh dwg hawj lanlan laenjlaenj faen gij doxgaiq ndeigwn duhde.

Baeznaengz gvaq ciet, meh Daeg’anh couh baeb haujlai hungz- bauh iq gyaeundei, ndawde cang 10 maenz ngaenz roxnaeuz 20 maenz ngaenz, yienzhaeuh lumj cienghginh ndwn youq gwnz daiz diemj bing nei, heuh bang lan bang laenj iq gvaqdaeuj lingx hungzbauh. Seizneix, lwgnyez lingx ndaej hungzbauh haenx cungj angqvauvau hemq naeuz:“Gyo- mbaiq daxbuz (daxdaiq), daxbuz (daxdaiq) gyaeusouh beij bya.” Meh Daeg’anh dingq le riu ndaej naj cungj nyaeuq caez.

Bingzseiz, meh Daeg’anh miznaj dangqmaz, lwglan baenz bang. Ndaw rug de ciengzseiz dong miz haujlai gij doxgaiq ndeigwn, miz dangz、 bingj、mak、dangauh、cijvaiz、yinjliu、mba lwgraz daengj, gijmaz cungj miz. Gij doxgaiq ndeigwn neix, cungj dwg gyoengq laenj iq ceiq ngah gwn lo. Bang laenj iq mizmbangj gag daeuj ra gwn, mizmbangj dwg meh Daeg’anh heuh daeuj ndaw rug doq guhcaemz doq gwn. Ndaw rug de lumj aen youzlozyenz lwgnyez nei, meh Daeg- anh couhdwg yenzcangj youzlozyenz, baenzngoenz riu dwk bak mbouj haep bae.

7 daeglwg meh Daeg’anh boux- boux cungj hauqgingq de, cungj naeuz “ndaw ranz miz bouxlaux dwg gaiq dijbauj ndeu”. Gyoengqde bang daxmeh laeb cek cunzcez ndeu, dawz gij ngaenz daxmeh yungh mbouj sat yo youq ngaenzhangz bae. Meh Daeg’anh gig daekeiq, bungz vunz couh lwnh bonjfaenh miz ngaenz lai ndaej yo youq ngaenzhangz ce.

Daeg’anh ciengzseiz daj ndaw singz dauqma yawj daxmeh de, daxmeh de gyaez gwn maz, de cungj rox ndaej cingcing cujcuj. Miz ngoenz ndeu, Daeg’anh daegdaengq daj gwnz haw cawx vanj faenjcaq ndeu ma hawj daxmeh. De gag ngeix daxmeh haengjdingh gwn ndaej angqvauvau bae. Byawz rox, daxmeh cix naeuz ngamq gwn haeux imq mbouj iek, bae heuh 3 boux laenj daeuj faen gwn vanj faenjcaq neix. Daeg’anh raen le ndawsim gamjdoengh raixcaix.

Gizsaed, meh Daeg’anh ceiq gyaez Daeg’anh lo, song bouxlaux gaen Daeg’anh bae ndaw singz gvaq ndwenngoenz mboengq haenx, Daeg- anh hix ciep bohda mehdaiq daeuj itheij gvaq, bohmeh baih lawz cungj hauqswnh. 4 boux vunzlaux bouxboux cungj gyaez Daeg’anh, daj ndawsim maij Daeg’anh……

Ndawsim meh Daeg’anh itcig miz aen mimiz iq ndeu, seng daegseiq le, couh maqmuengh seng saek song dah lwgmbwk, daengz laux le, couh ndaej yiengjsouh gij nemsim caeuq raeujrub “buhboemz iq”.

Daeg’anh rox simgei daxmeh, de rox saw rox leix, hauqgingq vunzlaux. De nai daxmeh naeuz:“Seng lwgsai lwgmbwk cungj doxdoengz, cungj dwg lwg, bouxboux cungj rox hauqgingq bohmeh. Raeuz dwg lwgsai hix rox haeujsim ciuqgoq mwngz.” Gangj ndaej daxmeh de angqyangz dangq- maz.

Daj boh Daeg’anh gvaqseiq le, ndangdaej meh Daeg’anh couh mbouj lumj gaxgonq baenzneix cangq lo. Geij beixnuengx yawj haeuj ndaw da, cix in youq ndawsim, gyoengqde gyoeb- comz youq giz ndeu, cienmonz daeuj doxyaeng, baenz faenh giluz laj neix:

Veiyi Giyau

It、Seizgan: Bi 2016 ndwen 8 ngoenz 17, singhgiz sam, ciet cungh- yenz.

Ngeih、Dieg haihoih: Gyangding ranz Daegroek caengz daihngeih.

Sam、Gij coh aen hoih: Ndawranz Lenzsiz Veiyi.

Seiq、Boux daeuj camgya:

(1) Boux ranzcawj 7 beixnuengx: Goengdaq、Daegngeih、Daegsam、Daegseiq、Daeghaj、Daegroek、Daegcaet.

(2) Boux daibyauj: Banh Cihmeiz、Banh Fanghlingz、Banh Haijyin、Banh Lingz.

Haj、Veiyi cujdaez: 7 beixnuengx doxlwnz ciuqgoq daxmeh.

(caengz sat)