●Mboengqneix, vunzlai Yungzanh Yen Daliengz Cin Mbanjgujlanz ciengj seiz guh- hong, ndaem ganq dinfaex makgaemjgaet, doenggvaq senj ganq dinfaex ndei、gaj non siudoeg、daihbungz ciepngaz daengj dinfwngz, yungh boiyingzyangj ganq dinfaex makgaemjgaet ndei, gai go 8 maenz doxhwnj, coicaenh vunzlai gungzhoj laisou, bang- rengz vut gungz baenz miz.

(Danz Gaijhingh)

●Mboengqneix, Baksaek Si Yougyangh Gih Lungzconh Cin banh cietfwen “sam nyied sam” gaiq nduj. Cietfwen hoz- dung neiyungz lai, miz doiq fwen、youz gai gouzfuk、ndawbiengz doxdax mizyinx、langhbaij doxgaiq daegsaek minzcuz、baij gai gijgwn ndei、ep bya doxdax daengj, yinx ndaej ca mbouj geijlai baenz 10 fanh vunz yienh gih、yanghcin、mbanj henzgyawj daeuj caeuqfaenh.

(Vangz Cwngzgvei)

●Geij bi neix daeuj, Dwzbauj Yen Yendung Yangh ciuq dieg bae guh, damqra cingzsoq yungh ndei dieg- namh, baengh yienh gaep caizcwng haeujcoengh、cien aen giyez bang cien aen mbanj daengj banhfap haenqrengz guh canjnieb banggungz, seiz- neix laebbaenz gak loih hoz- cozse dajndaem dajciengx 73 aen, nangqdaengz nonsei、makgam、mou、makgak daengj 19 aen dieggoek canjnieb cingq guh ndaej hoenghhwd, canjnieb nangqdaengz 1687 ranz ranzgungzhoj 7590 vunz, yawhsuenq bineix yaek saed- yienh 3 aen mbanjgungzhoj 463 ranz ranzgungzhoj 1635 vunz vut gungz.

(Cinz Yinzbauj)

●Geij bi neix daeuj, Vanzgyangh Mauznanzcuz Swciyen cauh gij binjbaiz makbug ndaw nding, daj- ndaem najdieg bi lai gvaq bi, baenz gij canjnieb youqgaenj banggungz aen yienh neix, huq mbouj you roen gai, dingzlai doenggvaq densangh、baij gai caeuq gaibuek gai liux, gyoengq vunzmbanj mbouj youheiq, ok rengz bae guh. Daengz seizneix, aen yienh neix gungh ndaem makbug ndaw nding miz 6.5 fanh moux.

(Veiz Yui)