Ndwen 4 ngoenz 8, Ginhcouh Si Ginhbwz Gih Dasw Cin Nanzgenh Cunhveij Mbanjnazbu aen hozdung cietfwen “sam nyied sam” youq aen vwnzva gvangjcangz ndaw mbanj banh, gyoengq vunzmbanj doxcomz youq giz ndeu caez angqhoh “sam nyied sam Bouxcuengh”. Aen fazdingz cunzdauq Vahcuengh Ginhbwz Gih Fazyen yungh seizgei “sam nyied sam” vunz comz neix, bae Mbanjnazbu haiguh aen hozdung minzcuz fapgvi haeuj mbanj, ndaej vunzlai haenh.

Mbanjnazbu dwg aen mbanj guhyiengh minzcuz Gvangjsih Boux- cuengh Swcigih, dwg aenmbanj gyaeujvunz Bouxcuengh comzyouq, fungsug lai, ndaw mbanj seizneix lij louz miz gij vwnzva Bouxcuengh noengznwdnwd. Aen fazdingz cunz- dauq Vahcuengh youq Mbanjnazbu hozdung yienhciengz laeb aen camh fugsaeh camcaz faplwd, fazgvanh Cuengh Gun song vah yungh Vah- cuengh gangj dap vunzlai camcaz faplwd, fat faplwd senhconz swhliu hawj gyoengq vunz daeuj caeuqfaenh hozdung “sam nyied sam” haenx, gangjgej mizgven dwkcawz bangvunz simnduk、baujhohlingh ndangvunz daengj faplwd cihsiz hawj vunzlai, daezsang gij fazci yisiz vunzlai.

Hozdung yienhciengz ndaej daengz vunzlai haenhndei, “boux gwnz muengx mizmingz” Mbanjnazbu——canghheiq haeuxnaengj haj saek Nungz Yuzhwngz caeuq fazgvanh Cuengh Gun song vah camcaz gij vwndiz faplwd, fazgvanh cungj gejdap sijsaeq. Boux vunzmbanj daeuj caeuq- faenh hozdung youq baihnaj fuk baengzhoengz senhconz Cuengh Gun song saw vah dingz roengzdaeuj, yungh Vahcuengh doeg Sawcuengh gwnz fuk baengzhoengz, vunzmbanj henzgyawj hix haenh nyauznyauz “Cuengh Gun song vah senhconz fapceih raeuj sim lai, hawj raeuz roxnyinh daengz gij heiqfaenh minzcuz doxgiet caeuq aeueiq minzcuz vunznoix, cungj senh- conz fuengsik neix ndei lai, haenh gyoengqsou!”

Geij bi neix daeuj, aen fazdingz cunzdauq Vahcuengh ietraez gij ciznwngz saemjbuenq, gaenxmaenx haiguh senhconz fapceih, hawj gij gvanhnen fapceih haeujlaeg sim vunz, vih cauh ok aenbiengz huzndei onjdingh daezhawj swhfaz baujcang rengzrwd.(Liuz Cinghfanz)