Sai:

Yaek baenzlawz baenzde,

Daengz geq sim mbouj bienq,

Gietsim caeuq mwngz lienh,

Sim mbouj bienq baenz ngaih.

Mbwk:

Yaek baenzlawz baenzde,

Daengz geq sim mbouj bienq,

Dawz bae coemh baenz cien,

Sim mbouj bienq baenz ngaih.

Sai:

Yaek baenzlawz baenzde,

Daengz geq sim mbouj doiq,

Naemj caeuq nuengx doengzdoih,

Sim mbouj doiq baenz ngaih.

Mbwk:

Yaek baenzlawz baenzde,

Daengz geq sim mbouj doiq,

Dawz bae coemh baenz hoi,

Sim mbouj doiq baenz ngaih.

Sai:

Yaek baenzlawz baenzde,

Geq dai sim mbouj naeuh,

Lienh mbouj ndaej doxaeu,

Dai simdaeuz mbouj nyienh.

Mbwk:

Yaek baenzlawz baenzde,

Geq dai sim mbouj naeuh,

Dawz bae coemh baenz daeuh,

Raeuz cungj aeu doengzdoih.

Sai:

Caeuq nuengx lienh doxaeu,

Sim youh raeuj youh van,

Ndaej nuengx daeuj caemh ranz,

Byaek ndaw banz did nyod.

Mbwk:

Caeuq beix lienh doxaeu,

Sim youh raeuj youh van,

Ndaej ndij beix caemh ranz,

Sim mbouj fanz saek loh.