Gyagoeng haeuj bineix daeuj roxnyinh sim’angq lai lo, saehndei gienh ciep gienh, mbouj cij dwg “saehndei baenz boengj” ne. Gienh saeh ceiq hawj gyagoeng sim’angq dwg, daeglan youh seng dah lwgnyaeq ndeu, ndawranz caiq dem lanlaenj, ciuq vah gyagoeng gangj couhdwg, aen loqsiengj seiq daih caemhyouq de engq luenzlub lo. Gyagoeng danq gaemz heiq naeuz:“Seiqvunz gou dai cix ndaej laepda lo.”

Gyagoeng bineix haeuj 80 bi, de miz sam daeglwg caeuq dahmbwk ndeu, seizneix sam daeglwg gaenq youq ndaw singz cawx miz ranzlaeuz roxnaeuz cawx dieg guh ranzlaeuz, caemhcaiq bouxboux miz ciiq; dah- mbwk haq bae gyanggai Namzningz, bouxgvan de dwg gunghyinz, dahmbwk gag guh seng’eiq, saedceij hix suenq gvaq ndaej bae. Seiq boux lwg gyagoeng gungh seng miz 6 boux lwglan, song daeglan hung gaenq baenzranz, youh caiq miz lwgnyez lo. Hoeng, aenvih song daeglan boux ngamq seng boux lanlaenj ndeu, roxnaeuz gyagoeng cungj roxnyinh lwg lai fuk lai, hoeng ndawranz lanlaenj noix caengz gaeuq habhoz geijlai. Sam bi gaxgonq guek raeuz gaenq ok cwngcwz moq, moix doiq gvanbaz hawj seng song boux lwg, daeg lanlaenj ceiq hung cix gaenq 6 bi, vihneix gyagoeng gienq daeglan caiq seng boux dem, hoeng gvanbaz daeglan mbouj nyienh lai seng, lauheiq lai ciengx boux lwg dwgrengz lai. Bi gvaq bi, yaepda song bi couh gvaqbae lo, daeg lanlaenj hung gaenq 8 bi, gyagoeng vihneix miz di simgip, de heuh daengx ranz vunzhung bae gienq gvanbaz daeglan, naeuz ranz raeuz mbouj lau ciengx mbouj ndaej lai boux lwglan, seizneix mbouj lumj doenghbaez lo, guekgya raeuz miz cwngcwz ndei raixcaix, cijaeu caezgya sij ndaej haenqrengz bae guh, saedceij couh yied gvaq yied ndaej ndei.

Mbouj rox dwg dingq caezgya gienq lai le, roxnaeuz gvanbaz daeglan gag ngeix doeng lo, bi’gvaq ndwen- caet gvaqciet, couh raen bawxlanngeih daiqndang ma lo. Daeglanngeih naeuz, de song gvanbaz gaenq doxyaeng ndei, youq rog dajgoeng daengz lajlab, couh dauqma ranzmbanj gag guh seng’eiq, buenx daengx ranz vunz youq, mbouj caiq bae diegrog dajgoeng lo. Daj seizhaenx hwnj, gyagoeng sim’angq lai lo.

Gyagoeng gag dauqngeix seiq- vunz swhgeij 40 bi gaxgonq, baengh guhhong cizdij daeuj ciengx ranz, dungx cungj gwn mbouj imq, vih gyu youz ndaw rek, de caeuq daxboh laeglemx bae buenq di doxgaiq dauq gai, daengxngoenz ndang saenzdedded lauheiq deng gaeb bae daeuq, saedceij gvaq ndaej caen mbouj sim’onj. Aenvih ranz hoj, 4 boux lwg cij ndaej soengq boux ndeu bae doegsaw.

Mboujgvaq, 40 bi baihlaeng, gyagoeng roxnyinh saedceij ngoenz beij ngoenz ndei. Guek raeuz saed- hengz gaijgwz hailangh le, 3 boux lwg mbouj ndaej doegsaw haenx mbouj nyienh caeuq bohmeh guh hongnaz, gyagoeng couh cuengq fwngz hawj gyoengqde bae guh seng’eiq, gak boux gak yienj ok bonjsaeh ak okdaeuj, saedceij yied daeuj yied ndei, 3 boux de couh gonqlaeng baenzranz. Caiq gvaq ndaej mbouj geij nanz, song daeglwg couh youq ndaw singz cawx ndaej dieg daeuj hwnj ranzlaeuz lo. Gyagoeng ngamq ndaej 55 bi couh mbouj aeu sinhoj guh hongnaz, daeuj ndaw singz caeuq lwg daiq lan, donqdonq ndoet cenj laeuj ndeu, saedceij gvaq ndaej gig cwxcaih.

Caiqnaeuz ndangdaej gyagoeng haemq cangq, mbouj geijhoz baenz bingh, gvaq ndaej onjdingh sim mbouj you, riunyumj dwddwd, vunzlai ciengzseiz duenq bi’ndwen de oiq gvaq 10 bi. Dingqnyi vunzlai baenz- neix haenh de, gyagoeng engq naj hai sim’angq lo. Yienznaeuz youq onj gwn van, hoeng 4 boux lwg cij ngamq miz 6 boux lwglan, gyagoeng gag roxnyinh caengz hab’eiq geijlai. Hoeng mwh- haenx gij cwngcwz senglwg guekgya couhdwg baenzneix, mbouj ndaej lai seng, caiqgangj 4 boux lwg bi beij bi geq lo, gyagoeng cij ndaej dawz gij siengjfap bonjfaenh yo ndawsim.

Ndwenngoenz lumj raemx lae, daengz ciuh daeglan gyagoeng maj- hung baenzgya lo, lajmbanj ndaw singz hix bienqvaq vaiqvwd. Ndaw singz ranzlaeuz doengh beij doengh sang, lajmbanj hix ranzranz caep ranzlaeuz, lajmbanj ndaw singz yied ndaej yied nauhyied. Hoeng, gyagoeng roxnyinh lij caengz gaeuq habhoz, de maij ngoenznaengz miz baenz gyoengq lwglan baez haeuj ranz couh heuh de “daxboh” roxnaeuz “daxgoeng”、“goenggeq”, miz gangj miz riu, yienghneix geijlai nauhyied ha! Ndigah, dingqgangj daeglan youh seng dah lanlaenj, gvanbaz daeglan yaek maranz caemhyouq lo, gyagoeng rox- nyinh aen loqsiengj de dauqdaej ndaej saedyienh lo.

Ngoenz ndeu, daeglandaih daiq dahlwg de daeuj ranz gou gwn ngaiz. Yienznaeuz dahlaenj youq henz daiz hemq mbouj dingz, hoeng gyagoeng mbouj yiemz de cauz, lij caeuq dah- laenj daeuq bak, ciengzseiz riuhoho.

Daeglandaih yawj le doiq gya- goeng naeuz:“Daxgoeng, gou bineix dajsuenq caiq seng boux lwg dem, mwngz naeuz baenz mbouj baenz ne?” Gyagoeng baez dingq daeglan baenz- neix gangj, angq dwk lienz naeuz:“Baenzlawz mbouj baenz! Gou naeuz baenz lai lo! Gou haethaemh maq- muengh miz lai boux lanlaenj ne! Mwngz yienghneix gangj gou couh ndoet laeuj ndaej engq van lo!” Daeglandaih riu naeuz:“Daxgoeng, danghnaeuz mwngz ndaej gyaeu daengz bak bi, couh ndaej 5 daih vunz caemhyouq bw!” Gyagoeng dingq le, riuhoho naeuz:“Ndei bw! Cijaeu gyoengq lwglan sou mbouj yiemz, gou couh siengj banhfap gyaeu daengz bak bi!”

Caezgya roxnyinh gyagoeng dwg gangjriu, mboujgvaq daeglandaih han naeuz:“Raeuz baenzlawz ndaej yiemz bouxlaux ne? Daxgoeng mwngz lai gwn di, bauj ndang cangq uk singj, gvaqlaeng geij boux lan doxlwnz daiq mwngz okrog bae lijyouz!” Dingq daeglandaih baenzneix gangj, gya- goeng angq dwk sing riu engq sang lo. Daengx ranz vunz caemh riuhaha hwnjdaeuj.