●Vih fatyiengz、swnj- cienz gij vwnzva Ywdoj, cienzdoh gij eiqsik Ywdoj ciengxndang cangqheiq, mboengqneix, Aen Yihyen Ywdoj Nazboh Yen bae daengz Nazboh Yen Daihngeih Siujyoz haiguh aen hozdung “vwnzva Ywdoj haeuj hagdangz”, senhconz gij cihsiz Ywdoj cangqheiq caeuq yawj bingh nem camcaz cangqheiq hawj gyoengq lauxsae hagseng.

(Luz Ciyungz)

●Geij bi neix daeuj, Lingzyinz Yen gaenjndaet hopheux gij moegbiu “daez- sang gij naengzlig vunzlai gungzhoj gag hwngfat ndaej vut gungz laisou”, yungh hwnjlaeb aen gihci ciengzseiz lienzgiet leih’ik canjnieb cinjcing banggungz guh cawjsienq, laebdin daengx yienh diuz lienh canjnieb hwngfat banggungz daegsaek canjnieb, gyamaenh daezswng cienzdoengj canjnieb, haenq- rengz gungganq daegsaek canjnieb, coicaenh daengx yienh vunzguhnaz laisou, saedyienh cinjcing vut gungz.

(Veiz Fucwngh)

●Ndwen 3 ngoenz 29, Dava Yauzcuz Swciyen youq Suijan Gunghyenz banh hozdung “doiq hamq eu fwen”. Canghfwen Bouxcuengh dang- dieg ndang daenj buhvaq minzcuz moqsag doxcomz giz ndeu doiqfwen, gangjok gij cingzngeih minzcuz beix- nuengx Bouxcuengh, caeuq lwgminz Bouxcuengh gyaez- maij byadah gyaeundei, guh- baenz fuk ciengzmienh nauh- yied gig miz minzcuz daegsaek ndeu.

(Vuz Mingzgyangh)

●Ndwen 3 ngoenz 27, Dunghlanz Yen Lauzdung Siujyoz cujciz daengx hag- dangz ca mbouj geijlai 3000 boux hagseng haiguh aen hozdung hagdangz minzcuz vwnzva nem minzcuz doxgiet cinbu gyauyuz, angqcoux cietndei “sam nyied sam Bouxcuengh”. Hozdung yungh “sam nyied sam Bouxcuengh·huzndei youq Betgveiq” guh cawjdaez, hozdung neiyungz lai mizyinx, miz langhbaij guh gijgwn ndei、dwkdomq caeuq roq aennyenz daengj vwnzva dijyuz hozdung hanghmoeg gig miz minzcuz daegsaek.

(Veiz Luzdungh)