Ndwen 3 ngoenz 8, Yungzsuij Myauzcuz Swciyen Dungdouz Yangh dieg youq gapgyaiq Gvangjsih Gveicouh neix gvaq ciet bauqva “ndwenngeih co’ngeih” bi gvaq baez haenx. Aen ciet neix dwg aen ciet cienzdoengj ceiq hung dangdieg, 2 fanh lai boux vunzlai mbanj henzgyawj gapgyaiq Gvangjsih caeuq Gveicouh caeuq bouxhek caemh angqhoh ngoenzciet. Haiguh ciengj bauqva、cien vunz Dungcuz diuq dohyeh、boq venz diuq fouxcaijdangz、guh doengznienz、foux saeceij daengj baenzdauq minzsuz hozdung daegsaek, cezmuz ndeiyawj dangqmaz.

Geij bi neix daeuj, riengzdwk dangdieg lijyouz canjnieb hwngfat, ciet bauqva dangguh aen minzsuz hozdung gig miz daegsaek ndawde aen ndeu, gaenq baenz diemjrongh lijyouz dangdieg.(Siz Fungh/石 峰)