Gou doeg gvaq coenz vahsug ndeu:“Saw mbouj gvaq raemxmboq, soh mbouj beij lwgnyez.” Gou rox- nyinh coenz vah neix gig miz dauhleix, boiqfug vunzgonq gangj ndaej baenzneix laegdaeuq.

Raemxmboq daj ndaw namh bongh hwnj, aeu bongh gvaq moengj caengz namh caengz rin, lumj muengx fouzsoq nei menhmenh daih gij nyuknyak ndawde bae, doeklaeng cij ndaej bongh ok gwnznamh daeuj, ndigah raemxmboq daegbied saw- cingh. Lwgnyez lij mbouj deng maz uq ndawsim, gyoengqde gvaigvetgvet caemhcaiq lauxsaed. Lwgda lwgnyez gig ronghsagsag, cinghlikik..

Gou son saw baenzlai bi, itcig caeuq lwgnyez doxyouq, haujlai baez, mbouj dwg gou son gyoengqde, fanjdauq dwg gyoengqde son gou.Yienznaeuz gyoengqde mbouj beij gou rox ndaej lai, hoeng mizseiz gyoengqde hix son gou baenzlawz bae guh saeh guh vunz.

Lumjbaenz danghnaeuz geij boux vunzhung miz maz saeh simnyap, baenzbaenz ndawsim cungj miz aen hot gej mbouj ok. Lwgnyez couh mbouj dwg yienghneix, mwngz ngamq naeuz de, de cienq ndang couh rox caeuq mwngz gangjriu lo. De cungj mbouj gawlwnh, cungj rox niemh mwngz doxndiep mwngz.

Gou ciengzseiz daezsingj gaeq- gou, aeu hozraez di, doiq gyoengq lwgnyez soeng di. Aen sim lwgnyez lumj naed raiz gwnz mbaw go’ngaeux nei, cinghseuq ronghmig youh gig vei deng soiq. Gou guh boux lauxsae yaek aeu haeujsim bae ganq bae hoh, aeueiq lwgnyez, mbouj aeu cungj laihnaeuz gyoengqde lij dwg lwgnyez, maz cungj mbouj rox dwk hat ndwi.

Mwngz doiq gyoengqde ndei, gyoengqde yienznaeuz lij iq, hoeng ndawsim lumj miz aen gingq nei, ciuq gij yiengh mwngz okdaeuj. Caemhcaiq gyoengqde ngw ndaej gig vaiq, miz yiengh hag yiengh. Ndigah caeuq gyoengq lwgnyez doxyouq, hix aeu haeujsim gangj vah caeuq dungcoz duh bonjfaenh, gaej son vaih gyoengqde. Raen lwgnyez najriu, ndawsim gou lumj ndaej ndit dak nei, caiq haemzhoj cungj dij lo. Mizseiz hwnjdangz seiz, miz lwgnyez sing hung naeuz:“Vangz lauxsae, gizneix mwngz son mbouj deng lo.” Gou hix mbouj laihnaeuz de dwg daegdaengq luenh swenj, gou aiq daengx roengzdaeuj yawjyawj de gangj ndaej deng mbouj deng.

Ngoenzngoenz caeuq bang lwg- nyez doxyouq, gou hix roxnyinh bonjfaenh bienq ndaej engq gyaez riu lo, lumj coz le haujlai bi.