Daengngoenz haet hwnj haemh doek, ronghndwen haemh swng haet roengz, baez yaep da, ndwenngoenz couh gvaqbae 20 lai bi lo, Mbanj- cuengh ranzranz hohhoh byaij hwnj diuzloh bienq fouqmiz. Sojmiz ranz- naez doi bingz liux, daengx mbanj ranzranz hohhoh cungj hwnj 5 caengz laeuz doxhwnj ranzmoq, roensuijniz youh gvangq youh soh cig doeng daengz bakdou ranz, ranzranz hix cawx ndaej gak cungj cihung ciiq, couh lienz henz daemz、aen caeng nyapnyaj、dieg va najranz laengranz daengj, cungj caeuq ndawsingz doxdoengz, doq hwnjguh caeuq ndaemganq. Miz vunz gangjriu naeuz:“Seizneix, couhcinj dwg daj Baekging daenj haiznaeng byaij daengz ranz, gwnz haiznaeng hix mbouj rox uq saekdi faenx bw.”

Daeglwg Daegmingz caeuq Dahlienz doeg daihhag baetnieb le, youq singz hung hix ra ndaej faenh hong ndei, hoeng, yawjraen Mbanj- cuengh bonjfaenh hwnjguh ndaej baenzneix gyaeundei dwggyaez, hix gag nyienh dauqma mbanjranz bang bohmeh banh giyez, lij youq rogmbanj damz miz dahyoux ndeu ne.

Daeglwg Daegmingz caeuq Dah- lienz yaek banh hoihlaeuj baenzgya seiz, Dahlienz cam Daegmingz naeuz:“Bohmeh Haijnanz mboujcaengz daeuj gvaq Mbanjcuengh raeuz, dwg mbouj dwg heuh gyoengqde daeuj baez ndeu yawjyawj ha?”

“Deng lo, ceiq ndei lu, hix wnggai hawj gyoengqde daeuj yawj- yawj Mbanjcuengh raeuz bienq ndaej baenzneix ndei lo.” Daegmingz dap ndaej sangj raixcaix.

Dahlienz sikhaek dawz soujgih okdaeuj dwk dienhvah hawj bohmeh naeuz:“Bohmeh, lanvaihseng sou yaek baenzgya lu, sou ndaej daeuj Mbanj- cuengh baez ndeu lwi?” Bohmeh Dahlienz hix sim’angq raixcaix, lan- vaihseng haujlai nanz mbouj daeuj Haijnanzdauj yawj gyoengqde lo, baezbaez cungj naeuz guhhong daiq nyaengq lai, mbouj ndaejhoengq geijlai. Ndigah, song boux vunzlaux sikhaek dapwngq ngoenzlaeng naengh feihgih gvaqdaeuj, hawj Dah- lienz itdingh aeu bae gihcangz ciep gyoengqde bw.

Daengz ngoenzhaenx le, Daeg- mingz couh hai aen ci “Audiz” ndeu, caeuq Dahlienz bae gihcangz ciep bohmeh.

Daegmingz caeuq Dahlienz ciep ndaej bohmeh le, Dahlienz angq- vauvau yien fwngz bohmeh cam ndei nai ndei, bohmeh raen lwgsau le hix sim’angq raixcaix.

“Boh， meh, naengh aen ciiq dou baema ba.” Dahlienz doq yien fwngz bohmeh yiengq aen ci ronghlwenq “Audiz” ndeu byaij gvaqbae doq riunyumnyum doiq bohmeh naeuz, Daegmingz couh riuj daeh hung daeh iq gyoengqde gaen youq baihlaeng byaij.

“Aen ciiq baenz gyaqciq, dou cungj cawx mbouj ndaej, sou cawx ndaej ha?” Daxmeh Dahlienz byaij daengz henz ci “Audiz” le, ngeizvaeg dwk cam naeuz.

“Dwg sou co daeuj luba?” Lienz daxboh Dahlienz cungj mbouj saenq geijlai.

Dahlienz riuhaha han naeuz:“Dwg dou baengh song fwngz gaenx guh cawx ndaej bw!” Daegmingz hix riunyumnyum ngaekngaek gyaeuj. Bohmeh lijdwg buenq saenq buenq ngeiz.

Daegmingz haici daengz bak- mbanj le, couh dingz roengzdaeuj hawj bohmeh ngonzyawj gij yiengh Mbanj- cuengh. Daxmeh Dahlienz hemq hwnjdaeuj naeuz:“Neix mbouj dwg ranzbezsu ha, dwg mbouj dwg sou daiq raeuz daeuj dieg fouqmiz youz la? Raeuz aeu bae raen lanvaihseng.”

“Mbouj dwg law, neix couhdwg aen Mbanjcuengh dou lo, sou roengz ci daeuj yawjyawj ba.” Daegmingz doq hai douci doq gienq bohmeh naeuz.

Bohmeh roengz ciiq le, baij youq dangqnaj gyoengqde dwk, baiz dem baiz coij dem coij ranzlaeuz gyaqciq, doengh aen ranzlaeuz neix rog ciengz cungj dwg diep rim menghau, dingj laeuz dwg vaxliuzliz, gaenq yawj mbouj ok saekdi gij riz ranznaez lo. Roensuijniz seuqsatsat cigsoh doeng daengz bakdou gak aen ranzlaeuz, gofaexmak song henz roen baiz dem baiz raemhrwdrwd, heiq vahom swnh rumz ci daeuj raq dem raq rangfwtfwt, caiq deng nditndat dak le, daengx aen Mbanjcuengh lengj ndaej lumj fuk veh nei, caen nyex vunz dwggyaez ya.

“Doenghgij ci neix cungj dwg ci gak ranz cawx ha?” Mehdaiq yawjraen lajlaeuz cungj baij miz gak cungj cihung ciiq baizokmingz, doq cam naeuz.

“Dwg ha, doengh aen ranzlaeuz caeuq doenghgij cihung ciiq neix, cungj dwg baengh ndawmbanj giyez souhaeuj caeuq guh dajsiuq vuenh daeuj hane, ranz dou hix dwg yienghneix bw.” Daegmingz riunyum- nyum gejnaeuz.

Dahlienz youh riengjret bouj naeuz:“Boh，meh, Daegmingz dwg gangj vah lauxsaed, aen laeuz ceiq sang haenx, couhdwg aen ranz dou lo.”

“Da raen dwg saedsaeh, aen mbanj neix ndaej caeuq ndawsingz beij gyaeu, caemhcaiq miz byaheu raemxsaw hopheux, dahlwg gou mbouj haq loek gvan ha!” Bohmeh seizneix caen saenq songde miz ngaenz cawx ci caeuq gag hwnq ndaej ranzlaeuz lo.

Mehdaiq naj riunyumnyum haenh naeuz:“Dwg ho, dahlwg gou haq youq gizneix hix mbouj loek bw, caen dwg aen Mbanjcuengh gyaeuqndei ndeu, hawj vunz simmaez raixcaix.”

Bohda hix daengj lwgfwngzmeh danq naeuz:“Neix caen dwg guek raeuz gaijgwz hailangh doxdaeuj, aen sukingj mbanjranz bienq ndei bienq fouqmiz ndeu!”（sat）