Ngoenzneix raeuz ndaejhoengq

Eu fwen soengq hawj dangj

Ngoenzneix raeuz sim sangj

Daeuj haenh gangj guekcoj

Daengngoenz doek roengz bo

Raeuz couh rox daengzhaemh

Seizgan baeraemraem

Guekcoj caemh bienqvaiq

Dangj gyaez raeuz lwgminz

Ciengxlwenx ninz mbouj ndaek

Seizseiz dawz raeuz naek

Gaek lwgminz haeujsim

Dangj gyaez raeuz lwgminz

Yinx raeuz byaij lohfouq

Vih duet mauh hoj gaeuq

Hwnzngoenz nyaengqnyatnyat

Caen ndang daeuj daiq daeuz

Aeu gohyoz ciengx ndaem

Lwgminz bouxboux gaen

Ranzranz caen bienq miz

Dangj yinx byaij lohfouq

Lwgminz bouxboux gaenx

Ciengz ndaem raeuz ndaej ngaenz

Gwn daenj mbouj aeu you

Gwn imq youh daenj raeuj

Mbouj caiq you deng iek

Haucau aeu doxgiet

Iet fwngz caez doxbang

Mbanjmbanj doeng goengloh

Hohhoh cungj doeng dienh

Siujgangh aeu saedyienh

Caez bienq yiengh guekcoj

Lajmbanj ceiq ciuqgoq

Rex hojgungz lajmbanj

Lwgminz raeuz ceiq angq

Dangq bya ndaej youz haij

Miz dangj daeuj bangcoh

Mbanj goj hix ndaej bienq

Doeng loh youh doeng dienh

Fuengbienh raeuz lwgminz

Faex hung aeu miz nye

Lwgnyez aeu hwnj hag

Mbouj yungh gyau ngaenz bak

Dangj gag diep ngaenz soengq

Bouxgeq hawj ciengxlaux

Diep cienz gauj daizheiq

Saedceij gvaq ndaej ndei

Ciengqheiq youh diuqfoux

Mbouj dwg gou gangjgyaj

Lajmbanj ngoenzngoenz bienq

Diegyouq lumj diegsien

Bouxboux nyienh daeuj youz

Gwn daenj raeuz bienq ndei

Sevei fazcanj vaiq

Baengh dangj dawz raeuz daiq

Lwgminz sim hai va

Ngoenzneix raeuz ndaejhoengq

Eu fwen soengq hawj dangj

Raeuz lwgminz lajmbanj

Gaen dangj byaij baenaj