Ndawsim Daegmingz gag gvaiq bonjfaenh mbouj miz bonjsaeh, Daegmingz vaiq byaij coh Dahlienz, yaengyaeng yungh genbuh bonjfaenh bang Dahlienz uet bae raemxda.

“Gomingz, gou lae raemxda, mbouj dwg ienqhoij haq hawj mwngz. Gou gawq dwg vunz ranz mwngz lo, ndawranz lijdwg baenzneix gungzhoj, gou hix miz cwzyin ya.” Gangj sat, Dahlienz engq dwg raemxda doek- mboegmboeg roengzdaeuj.

Sawqmwh, Dahlienz lumj fat- mieng nei, gawq dwg doiq Daegmingz, hix dwg doiq daxboh naeuz:“Baezneix maranz, gou couh mbouj dauq bae Haijnanzdauj lo, gou aeu louz roengz- daeuj, caeuq daihgya caez hwnjguh mbanjranz.” Dahlienz gag uet hawq raemxda, naj riunyumnyum byaij daengz dangqnaj daxboh naeuz:“Gungz couh aeu siengj banhfap bienq ndei! Raeuz caez cauhnieb ba!”

“Mwngz mbouj yiemz ranz raeuz gungzhoj ha?” Daegmingz cam Dah- lienz naeuz.

“Yiemz couh mbouj haq hawj mwngz lo, gawqyienz haq daeuj daengz gizneix, gou couh ciengxlwenx mbouj rox ienqhoij.” Dahlienz hix- naengz yienghneix han naeuz.

Vunzlai cungj naeuz, bouxsai miz raemxda mbouj seizbienh lae, sawq- mwh dingqnyi mehyah bonjfaenh yienghneix gangj, Daegmingz gamj- doengh ndaej lae raemxda lo. Daxboh Daegmingz hix lae ok raemxda, lij gikdoengh dwk haenh naeuz:“Mbwn- laux miz da lo, dahbawx baenz roxsoq haq daeuj ranz gou.”

Bak gangj okdaeuj yungzheih, guh hwnjdaeuj couh hojnanz lu, mbanjranz seiqdaih cungj gungzndoq, cawz moix hoh miz saek moux baj reih le, gizyawz seiqlengq cungj dwg goengq dem goengq rinbya, aeu cauhnieb ndaej baenz, daj gyawz gangj hwnj ho. Ndawsim Daegmingz saedcaih mbouj miz daej, conghbak Dahlienz yienznaeuz geng, hoeng ndawsim hix dwg mbouj miz saekdi cawjeiq lo.

Miz haemh ndeu, Aungeih gvaqdaeuj caeuq ranz Daegmingz caez gwn haeuxcaeuz, ndawranz caiq mbouj miz daengq hawj Aungeih naengh lo, cingqngamj henz bakdou miz ngauq rin hung ndeu, Daegmingz sikhaek buen ngauqrin gvaqdaeuj hawj Aungeih naengh.

“Miz lo!” Dahlienz sawqmwh angq ndaej daih hemq hwnjdaeuj naeuz.

Daengx ranz vunz cungj ngeiz- vaeg caez, Daegmingz doq cimyawj Dahlienz doq cam Dahlienz naeuz:“Miz maz la?”

“Miz monzloh lo.” Dahlienz rox- nyinh daihgya mbouj roxyiuj gij cawjeiq bonjfaenh, couh gejnaeuz:“Raeuz mbouj dwg guh boiqgienh fansa ha? Sa aeu rin caeuq suijniz doxgyaux cij ndaej dajhwnj, mbanj- ranz raeuz miz rin daihbaj, aeu geijlai cungj mbouj rox caenh, raeuz couh dub rin gai aeu cienz ba.”

Dahlienz baenzneix daezsingj le, daihgya roxnyinh guh ndaej bw, hoeng, aeu cawx hongdawz caeuq heiqci daengj haujlai doxgaiq cij ndaej banhguh hwnjdaeuj! Bae gyawz ra comz cienzbonj ya? Vunz mbanjranz haengjdingh dwg mbouj miz cienz, cungj banhfap neix siengj cungj gaej siengj lo. Daegmingz song bi neix okbae dajgoeng, yienznaeuz ndaej di cienzhong he, hoeng doq yungh doq gwn le, cij lw geij cien maenz ndwi lo. Daegmingz dawz ok geij cien maenz ngaenz dajgoeng ndaej; Dahlienz youh sij saenq hawj bohmeh bonjfaenh ciq geij cien maenz ngaenz, cawx hongdawz caeuq siucaq gonq, aen cangjdubrin ndeu couh yienghneix sawq haigoeng hwnjdaeuj lo.

Gangj guh couh guh, guh couh aeu roengzrengz guh ndei. Daegmingz caeuq Dahlienz daiq geij boux caencik hwnzngoenz haenq guh, youh caq rinbya youh dub soiq rin ndaek, rin dub ndaej loq lai le, gyoengqde cij fatyienh, mbouj miz roen hung, baenzlawz daeh rinsoiq okbae ne, nanzdauh aeu vunz rap okbae?

Daegmingz caeuq Dahlienz sim- gip raixcaix, hwnzngoenz cimyawj doenghgij rinsoiq dub ndei haenx siengj bae naemj dauq, roxnyinh mbouj coih roen hung mbouj ndaej lo, hoeng bae gyawz aeu baenzlai cienz ne? Cingqngamj seizhaenx Daegmingz dingqnyi vunz cienz naeuz, ndaw yienh miz gunghcozdui bang gungz bienq fouq daeuj, gyoengqde cienmonz bang dieggungz coih goengloh、banh cangj iq roxnaeuz yinx raemxgwn hawj mbanj gungzhoj daengjdaengj. Song gvanbaz doxyaeng le, couh gietdingh bae ra gij ganbu ndaw gunghse, caen dwg seizheiq ndei, gunghse ganbu couh daiq Daegmingz bae ra gungh- cozdui bang gungz bienq fouq. Gunghcozdui nyinhcaen dingq Daeg- mingz lwnhgangj gij siengjfap caeuq guhfap de, youh daiq conhgyah daeuj damqcaz roenloh, doeklaeng gietdingh bued cienz coih roen hung hawj mbanj Daegmingz, fuengbienh gyoengqde daeh rinsoiq okbae gai, maqmuengh diuz roen hung neix caen bienqbaenz diuz “roen comz ngaenz”.

Caen hawj vunz dwg’angq lo, Daegmingz caeuq Dahlienz songde mboujdan baengh bonjfaenh roengz- rengz haenq guh, youh bungz dangj cwngcwz ndei, bihaenx dub rinsoiq gai cienz couh canh ndaej fanh maenz, bienqbaenz “hohfanhmaenz” lo, caen dwg cijaeu roengzrengz haenq guh, couh ndaej byaij hwnj roen fouqmiz.

Hoeng, Daegmingz lij geiq maenh gij vah gunghcozdui bang gungz bienq fouq, gag fouq mbouj suenq fouqmiz, cijaeu daihgya gwn imq daenj raeuj caez bienq fouq le, cij suenq fouqmiz. Yienghneix, Daegmingz couh aeu fanh maenz ngaenz neix guh cienzgoek, cingj bouxsai vunz ndaw mbanj daeuj dub rin, laebguh aen gunghcangj loq miz gveihmoz gyagoeng rinliuh ndeu, doeklaeng youh hwngfat baenz aen giyez rinsoiq gyagoeng、swnghcanj、dajyinh daj nduj guh daengz byai ndeu, hawj moix ranz moix bi souhaeuj mbouj noix 3 fanh maenz, dub rin saehnieb ciemhciemh banh ndaej mwnhoengh hwnjdaeuj lo.

（caengz sat）