Mboengqneix, densi cezmuz vah minzcuz 《Rengzhoengh Sanglinz》 Sanglinz Yen Gvangjbo Densidaiz roengzsim ingj guh haenx haiboq, cezmuz yungh Vahcuengh bonjdieg gaisau lizsij vwnzva Sanglinz、doxgaiq daegsaek、gijgwn ndei deihfueng、dieggingj lijyouz, banggungz baenz miz, gangj ndei gojgaeq Sanglinz, cienzboq sing’yaem Sanglinz, langhbaij yiengh- ndei seizdaih moq Sanglinz.

《Rengzhoengh Sanglinz》 moix singgeiz it banhaemh 9 diemj cung cuengq baez nduj, ngoenz daihngeih banringz 1 diemj cung、banhaemh 9 diemj cung dauqcungz cuengq. Cezmuz boqcuengq le ndaej daengz gyoengq bouxyawj haengjgyaez, roxnyinh cezmuz haeujgyawj vunzlai、yawjnaek ndwenngoenz beksingq, cienzboq vah minzcuz haemq ndei.

Sanglinz Yen dwg naed caw ronghsag ndeu sieng youq gwnz diuz sienq dauqgvi baek. Gizneix dwg dieggoek vwnzva mehlungz ranghdieg Cuhgyangh, hix dwg dieggoek ngoenz- ciet cienzdoengj “sam nyied sam” Bouxcuengh, lizsij vwnzva goekdaej laegna, gizdieg vwnzva lai cungj lai yiengh. Sanglinz Yen swhyenz lai, miz haeuxgok、makgat、mbawcaz、rangzvan daengj doxgaiq reihnaz swnghdai daegbied gagmiz, lijmiz ngaiz daengx duz bya、haeuxnaengj haj saek、nohgoemj daengj gijgwn ndei daegsaek Mbanjcuengh dem, hawj vunz yinx lai.

(Lij Dauyungj/李道永)