“Gou dingqnaeuz Siujloz mizseiz gvaq ngoenzseng seiz daxbuz de ceiq lai cawj vanj mienh caeuq song aen gyaeqgaeq hawj de, mizseiz hong nyaengq lai maz cungj mbouj miz……”

Gyoengq doengzhag ngeixlwnh faenfaen, Siujloz duixgyaeuj roengzdaeuj, naj nding- gvaenggvaeng ndwn youq.

Raen daengz neix, Cangh lauxsae roxnyinh gig doeksaet, de naeuz:“Gyoengq doengzhag gaej cauz lo, gak ranz cingzgvang mbouj doxdoengz, ndigah gwndaenj fuengsik caeuq sibgvenq hix mbouj doxdoengz, sou naeuz dwg lwi?”

“Dwg, lauxsae!” Goengq hagseng sikhaek caez sing han naeuz.

Cangh lauxsae naeuz:“Yienghneix ba, daengz seiz raeuz hawj Siujloz doengzhag gvaq aen ngoenzseng vaiqvued he, ndei mbouj ndei?”

Gyoengq hagseng youh caez sing dap naeuz:“Ndei ha, lauxsae!”

Dingq gij sing gvaigvet neix, muenghmuengh gij faj naj ndeigyaez, Cangh lauxsae riunyumj, ndawsim van lumj dangzrwi nei, lwgda de gaenq mbouj rox seizlawz miz di mbaeq lo.

Gvaq song ngoenz le, Cangh lauxsae couh roengz mbanj bae daengz ranz Siujloz. Siujloz daengx ranz vunz caenx youq aen ranzbingz iqet gaebged laepfub ndeu, ndawranz cij miz aen densi gaeuq he baij youq gizhaenx. Daxgoeng daxbuz Siujloz cingq nyaengqfoedfoed buen haeux bae gwnz dingjranz dak, Siujloz hix nyaengq dwk swiq byaek cawj ngaiz.

Raen Cangh lauxsae daeuj, gyoengqde miz di doeksaet, muengz heuh Cangh lauxsae naengh roengzdaeuj, Siujloz hix doq ndenq cenj raemx he gvaqbae hawj Cangh lauxsae. Daxgoeng daxbuz Siujloz gig ndatcingz caeuq Cangh lauxsae gangjgoj, aen ranz gaebged haenx seiz mbouj seiz cienz ok sing gangj sing riu gyoengqde. Rox daxgoeng daxbuz Siujloz gaenq 70 geij bi lij guh hongnazreih、ndawranz gyoengqde haemq gungzhoj seiz, Cangh lauxsae miz di nanzgvaq.

Biek le gyoengqde, byaij ma coh hagdangz seiz, Cangh lauxsae roxnyinh aen sim swhgeij naek- gywdgywd.

Ngoenzseng Siujloz daengz lo, seizneix gaenq cuengq sujgyaj. Ngoenzde Cangh lauxsae caeuq 32 boux hagseng angqfwngfwng riuj dangauh caeuq dangz、mak daengz ranz Siujloz seiz, raen faj dou suj ndaej maenhndwt, mbouj raen saek boux youq ranz.

Boux ranznden naeuz, gyoengqde sam boux daj haetromh couh bae doenghnaz gvej haeux lo. Cangh lauxsae youh caeuq gyoengq hagseng bae coh doenghnaz. Seizneix Siujloz gyoengqde lij nyaengq dwk. Raen daengz neix, lai vah mbouj gangj, Cangh lauxsae caeuq gyoengq hagseng mizdi bang gvej haeux, mizdi cang haeux haeuj daeh, mizdi buen haeux daengz henz roen cuengq gwnz ci rag baema.

Sou haeux sat ma daengz ranz le, Cangh lauxsae caeuq gyoengq hagseng goq mbouj ndaej gwn saek gaemz raemx, gyoengqde muengz heuh daihgya dawz dangauh、lab、mak、yinjliu baij youq gwnz daiz. Cangh lauxsae dawz lab cap gwnz dangauh diemj dawz, dauj boi yinjliu, riu naeuz:“Gyoengq doengzhag, raeuz ngoenzneix couh hawj Siujloz doengzhag gvaq aen ngoenzseng ba!” Gyoengq doengzhag cungj bekfwngz hwnjdaeuj, bouxboux gwnz naj riunyumnyum, mizmbangj gwnz naj lij uq di boengz.

“Hoh mwngz ngoenzseng vaiqvued, hoh mwngz ngoenzseng vaiqvued, hoh mwngz ngoenzseng vaiqvued……” Sing go goksasa, Siujloz ndwn youq ndaw cungqgyang gyoengqvunz, riu ndaej diemzsisi. Muengh dwk faj naj gyaeundei Cangh lauxsae, muengh dwk doenghgij faj naj doengzhag Siujloz ndeigyaez neix, daxgoeng daxbuz Siujloz cungj mbouj rox gangj maz, songde gaemdawz fwngz Cangh lauxsae gig ndaet, youh lumhlumh gyaeuj doengzhag Siujloz iqet neix, lwgda mbouj rox seizlawz gaenq nding lo, dumz lo.

（sat）