Mbouj rox dwg ciuh lawz bi lawz, duz guk iek ndeu daj ndaw ndoeng okdaeuj, haeuj daengz ndaw mbanj, ndonj haeuj riengh mou ranz bouxguhnaz ndeu bae, siengj caeg gwn duzmou.

Ranz bouxguhnaz neix ndoq lai, dingjranz cungj dwg goemq haz, baez daengz fwn doek, raemx cungj roh roengz mbonq, vunzhung lwgnyez cungj ninz mbouj onj. Ndigah, gyoengqde cungj lau ranz roh. Haemhneix, lwgnyez ranz neix mbouj rox vihmaz daej mbouj daengx saekdi, daxmeh daeuq goj daeuq mbouj daengx, baez hozgaek, couh haep de naeuz: “Mwngz nyaengz daej, yahvaiz dingq ndaej nyi couh daeuj aeu mwngz bae!” Lwgnyez lijdwg daej mbouj daengx. Daxmeh youh naeuz:“Nyaengz daej, duzguk daeuj haeb mwngz!” Lwgnyez ciuqgaeuq daej. Daxmeh mbouj miz banhfap, cijndei naeuz:“Mwngz nyaengz daej, ranz roh couh ma lo, raeuz cungj ninz mbouj onj.” Baezneix, boux lwgnyez gwq daej neix dingqnyi naeuz ranz roh, sikhaek couh mbouj daej lo.

Duzguk ndoj youq ndaw riengh dingq ndaej nyi le, sim siengj: Dai lo, boux lwgnyez neix mbouj lau yahvaiz, lienz gou hix mbouj lau, dauq lau ranz roh, yawj hwnjdaeuj ranz roh haengj- dingh rengz hung gvaq gou, yak gvaq gou, baezlaeng gou aeu haeujsim cij ndaej, gaej bungz ranz roh cij ndei.

Dingjlingz haemhneix, bouxguh- caeg ndeu cang baenz yahvaiz hix daeuj ranz neix siengj caeg mou, youq ndaw riengh mou lax bae lax dauq. Yienzlaiz ranz neix ngamq ciengx duz mou dog, gaenq gai lo, seizneix ndaw riengh byouqhumz, cijmiz duzguk ndoj youq ndaw doi fangz. Bouxguhcaeg neix doeklaeng lumh daengz duzguk, laihnaeuz dwg duzmou, couh maz cungj mbouj goq, gwed hwnj couh deuz lo. Duzguk deng gwed sim siengj: Byawz mbei baenzneix hung, gamj gwed gou hwnj? Itdingh dwg ranz roh, baezneix gou suenq boihseiz lo! Ndigah duzguk mbouj gamj cukcak caemh mbouj gamj rongx, dinghdingh youq hawj bouxguhcaeg neix gwed de.

Bouxguhcaeg neix gwed duzguk buet le 20 lai leix roen, daengz mbwn yaek rongh, de hix baeg lo, couh bae daengz laj gofaex bakgemh yietbaeg. De cuengq roengz “duzmou” gwnz mbaq, baez yawj, dai lo! Gingqyienz dwg duz guk ndeu, lau dwk cengdi ngunh gvaqbae, couh mbaqmbingh benz hwnj gofaex bae ndoj, mbouj gamj roengzdaeuj lo.

Duzguk laj gofaex laihnaeuz de dwg ranz roh, hix mbouj gamj buet- deuz, songde couh yienghneix doiq- dingj mbouj doengh. Gvaq le haujlai nanz, miz duz lingz ndeu byaij gvaq henz, raen duzguk naengh youq laj gofaex, couh riu cam de:“Goguk, mwngz mbouj haeuj mbanj bae caeg mou gaeb ma, dauq youq gizneix guh maz?”Duzguk lijdwg lau, naeuz:“Nuengxlingz, mwngz mbouj rox, gou haemhlwenz couh bae ranz boux- guhnaz ndeu caeg mou, doeklaeng dauq deng ranz roh gwed daeuj gizneix, seizneix de couh youq gwnz gofaex. Mwngz daeuj couh ndei lo, mwngz hwnj gofaex bae caz yawj, dauqdaej ranz roh dwglau lwi? Danghnaeuz dwglau, raeuz couh buet.” Duzlingz doq cam:“Maz dwg ranz roh?” Duzguk neix sing iq dap naeuz:“Beij yahvaiz caeuq gou lij rengz hung lij yak.” Duzlingz gvai ngeix le yaep ndeu, naeuz:“Baenzneix guh mbouj ndaej! Danghnaeuz dwg ranz roh, mwngz buet ndaej vaiq, gveng gou roengz gou couh dai lo.” Duzguk raen de gangj ndaej miz dauhleix, couh naeuz:“Yienghneix mwngz bae ra diuz gaeu nyap ndeu daeuj, gyaeuj ndeu lamh ndang mwngz, gyaeuj ndeu lamh ndang gou, danghnaeuz dwg ranz roh, gou couh rag mwngz buet.”

Duzlingz raen baenzneix guh goj ndei, couh ra diuz gaeu hung ndeu daeuj, ciuq vah duzguk gangj bae guh. Lamh le de couh benz hwnj gofaex bae, bouxguhcaeg youq gwnz gofaex dingqnyi gij vah songde, lau dwk saenzdedded, raen duzlingz benz hwnjdaeuj, couh ok nyouh dangzvaq lo, cingqngamj duzlingz ngiengxgyaeuj yawj, nyouh bouxguhcaeg couh doiq song lwg da de doek roengzbae, manhsaengsaeng, duzlingz mbaj- mbwt hemq naeuz:“Dwg ranz roh……roh ……”

Duzguk baez dingq daengz cih “roh”, couh buekmingh buetdeuz, duzlingz deng de daj gwnz faex rag roengzdaeuj bungq doeng daemj sae yaek dai hix mbouj goq, bak duzlingz deng dek lo. Duzguk buet le cibgeij lai leix roen, baeg lo, daengx roengzdaeuj diemcaw, nyeuxgyaeuj baez yawj, duzlingz cingq youq gizhaenx riu! Duzguk hozgaek dwk naeuz:“Gou rag mwngz buet baeg dwk yaek dai, mwngz nangh youq baihlaeng aj bak riu!” Caiq gangj baenzlai nanz mbouj ndaej gwn doxgaiq, duzguk couh bongh gvaqbae haep gwn duzlingz bae lo.