Cengbak hoizbak mwngz coenz gou coenz, cingzeiq gaenq mbouj miz lo, saehcingz gaenq daengz aen deihbouh neix, songde couh doxliz lo, Siujloz riengz daxboh, gak boux gag gvaq ndwenngoenz.

Boh Siujloz mbouj miz vunz guenj, couh engq laengzsaengj lo, boux ndeu youq rog dajgoeng, bi daengz haemh cij haeuj ranz, hix gig noix geiq cienz maranz, Siujloz roxnyinh miz di doeknaiq, mizseiz Siujloz hix gig siengjniemh daxboh. Mwh yaek daengz cieng seiz, cijaeu dingqnyi rog ranz miz vunz byaij roxnaeuz gangj vah, Siujloz couh buet okdaeuj muengh, baez youh baez saetmuengh, youh baez doek baez ndawsim couxrim maqmuengh, cungj- suenq caj raen daxboh aemq daeh maranz lo.

Caeuq daxgoeng daxbuz youq, songde geq lo, Siujloz bingzseiz hix aeu guh di hong mbaeu hongfwngz, mbouj ndaej lumj gij nyezdoih iq baez cuengqhag roxnaeuz ngoenzsinggeiz ndaejhoengq couh doeng bae sae youz, lumj vaiz langhbuengq nei dauqcawq guhcaemz. Mizseiz Siujloz guhhong sat le cijndaej caemsim sij cozyez.

Banhcujyin Siujloz Cangh lauxsae ngamq daj hagdangz wnq diuh daeuj. De ndaej 20 geij bi, gyaeundei youh simsoh, doiq lwgda youh hung youh ndaem yaepmyabmyab couh lumj rox gangj vah nei, gig nyex vunz gyaez, gyoengq hagseng cungj gig maij de. Cangh lauxsae sonhag hix gig miz fuengfap, hagseng dingq ndaej rox geiq ndaej vaiq, de lij ciengz haeuj ranz bae caeuq gyoengq bohmeh hagseng gangjgoj, gyoengq bohmeh hagseng caeuq bouxdaeuz hagdangz cungj haenh de.

Miz ngoenz he, Cangh lauxsae caeuq gyoengq hagseng guh sat aen youzheiq he le, angqvauvau cam gyoengq hagseng aen siengjmuengh ndawsim swhgeij dwg maz? Vah ngamq ok bak, gyoengq hagseng cungj ceng gonq lau laeng gangjfaenfaen. Mizmbangj naeuz, majhung le yaek dang canghyw, bang vunz yw bingh; mizmbangj naeuz majhung le dang gohyozgyah, yenzgiu gij saehcingz gyoengq vunz caengz rox; mizmbangj naeuz, majhung le aeu lumj Cangh lauxsae nei, dang lauxsae, hawj lwgnyez son saw……Dingq gyoengq hagseng gangj le, Cangh lauxsae muengh dwk daihgya ngaekgyaeuj riunyum- nyum.

Lwnz daengz Siujloz gangj vah seiz, de ndwn hwnjdaeuj sing iq naeuz:“Lauxsae, aen siengj- muengh gou gig iq, siengj gvaq aen ngoenzseng vaiqvued ndeu, miz dangauh, lij miz haujlai vunz caeuq gou caez ciengq souj go hoh ngoenzseng vaiqvued.”

Vah ngamq dingz, mizmbangj doengzhag couh riu hwnjdaeuj lo, “neix lij mbouj yungzheih? Gou bibi cungj dwg baenzneix gvaq!”

“Dwg bw, neix miz maz citgeiz, gou

laihnaeuz maz dem!” Mizmbangj doengzhag naeuz.

Mizmbangj doengzhag couh sing saeq ngeix- lwnh hwnjdaeuj, “lij iq seiz bohmeh de couh doxliz lo, daxboh de youq rog dajgoeng youh gig noix maranz, riengz daxgoeng daxbuz youq, songde bingzseiz mbaet gwn mbaet yungh, baenzlawz sij ndaej bae cawx dangauh ne.”（caengz sat）