Sai:

Cibgouj Daih ciuhai,

Raeuz angq lai lo nuengx,

Gwndaenj cungj miz muengh,

Cuengq sing hoh song coenz.

Mbwk:

Baihgwnz caen dwg ndei,

Seizseiz ngeix daengz raeuz,

Boux dafangz hwet gaeuz,

Soengq haeux youh soengq ngaenz.

Sai:

Seizdaih moq caen ndei,

Mbouj vei raeuz beksingq,

Boux ndaw singz boux mbanj,

Ranzlaeuz aen’aen moq.

Mbwk:

Seizdaih moq caen ndei,

Mbouj vei raeuz boux geq,

Ciengx raeuz lumj bohmeh,

Gizndei geq mbouj caenh.

Sai:

Bohmeh raeuz sinhoj,

Mbouj rox ienq rox lumz,

Daj iq ciengx raeuz hung,

Mbouj ndaej lumz bohmeh.

Mbwk:

Bohmeh raeuz sinhoj,

Mbouj rox ienq rox lumz,

Seiz miz daenj miz gwn,

Mbouj ndaej lumz bohmeh.

Sai:

Bohmeh raeuz sinhoj,

Raeuz boiz mbouj rox liux,

Miz ndei gwn aeu heuh,

Miz geu daenj aeu soengq.

Mbwk:

Bohmeh gaeuzngongo,

Lij hwnj bo aeu fwnz,

Ngoenz ndit caeuq ngoenz fwn,

Mbouj miz gwn hix ganq.

Sai:

Bohmeh raeuz sinhoj,

Mbouj rox aeu maz boiz,

Ciengx vaiz langh gwnz ndoi,

Youh doiq dauq guhhong.

Mbwk:

Byoem hau daengz gwnz gyaeuj,

Raeuz baeux ra ndaej gwn,

Doengzdoih youq lajmbwn,

Gwn mbouj lumz bohmeh.

Sai:

Byoem hau daengz gwnz gyaeuj,

Yienznaeuz da caeux raiz,

Ngoenzngoenz bae langh vaiz,

Baeg yaek dai yaek naeuh.

Mbwk:

Fwn doek boh hix bae,

Byajraez meh hix byaij,

Ngoenz bae gai bae mbanj,

Lij ganj dauq guhhong.

Sai:

Bohmeh raeuz miz sim,

Gwn imq couh bae doengh,

Ngoenz haw caeuq ngoenz hoengq,

Gyoengq hong guh mbouj daengx.

Mbwk:

Mizmbangj boux lwgnyaeq,

Aen sim ngeix mbouj daengz,

Caeuq bohmeh doxcaengz,

Mbouj baenz vunz lajdeih.

Sai:

Bohmeh raeuz sinhoj,

Raeuz gag rox cij baenz,

Hawj saek gak saek faen,

Da raen mbouj ndaej ndaq.

Mbwk:

Gaej yawj boh mbouj daengz,

Gaej caengz meh mbouj deng,

Gaxgonq raeuz lwg’engq,

Meh yawj bengz gvaq gim.

Sai:

Raeuz bae ndaq vunz geq,

Yaek aeu re ngoenzlaeng,

Cog raeuz geq daeuj daengz,

Ra boux baengh mbouj miz.

Mbwk:

Lengqboux gaenq baenz gya,

Lij bae ndaq bohmeh,

Song laux yienznaeuz geq,

Sim mbouj veq gyaez raeuz.

Sai:

Bohmeh ciengx raeuz hung,

Miz gwn aeu rox geiq,

Cog raeuz miz lwg nyaeq,

Ndaej miz boux swnj ciuh.

Mbwk:

Bohmeh raeuz ndaej souh,

Fouz nyap onj caux ranz,

Miz boux geq daiq lan,

Raeuz mbouj fanz mbouj you.

Sai:

Ngoenzneix miz gwn daenj,

Gaej lumz faenh bohmeh,

Langh mbouj miz gyoengqde,

Raeuz ce mingh ndaej lwi?

Mbwk:

Bohmeh ndang ndaej souh,

Douranz coux fukheiq,

Ngaenz lai mbouj bienh geiq,

Beij ndaej ranz miz laux？

Sai:

Song laux ndang lij cangq,

Langh gwn ndaej engq ndei,

Baihgwnz meiz(miz) ngaenz ciengx,

Mbouj siengsim sieng uk.

Mbwk:

Song laux ndang lij cangq,

Langh naengh ndwi hix baenz,

Miz cwngfuj aemq laeng,

Goq daengz liux daengz caenh.

Sai:

Guh fwen bauj bohmeh,

Yied geq ndang yied cangq,

Ngoenz youq ranz yawj lan,

Baenzngoenz angqvauvau.

Mbwk:

Guh fwen bauj bohmeh,

Yied geq ndang yied cangq,

Saedceij ngoenzngoenz angq,

Sim’an youh cwxcaih.

Sai:

Raeuz bauj daengz coenz neix,

Heuh beixnuengx yietnaiq,

Bauj lai lij miz lai,

Nai mbouj sat mbouj caenh.

Mbwk:

Raeuz bauj daengz coenz neix,

Heuh beixnuengx bae ranz,

Langh geq youq ndaw mbanj,

Muengh lwglan dauq yawj.